مەملەكەت باسشىسى قاسىم-جومارت توقاەۆ مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقبايدى قابىلدادى، دەپ حابارلايدى "ادىرنا" ۇلتتى پورتالى اقوردانىڭ ءباسپاسوز قىزمەتىنە سىلتەپ.
سونىمەن قاتار اشىق مەملەكەتتىك اپپارات قۇرۋ، اتاپ ايتقاندا، جەكە سەكتوردان بىلىكتى مامانداردى تارتۋ جانە جوعارى وقۋ ورىندارىن ۇزدىك بىتىرگەن تۇلەكتەردى تومەنگى لاۋازىمدارعا كونكۋرس وتكىزبەي-اق تاعايىنداۋ شارالارى جونىندە مالىمەت بەرىلدى.
پرەزيدەنتكە e-Qyzmet جۇيەسى بويىنشا مەملەكەتتىك قىزمەتكە ىرىكتەۋ جونىندەگى پيلوتتىق جوبانىڭ قورىتىندىسى تانىستىرىلدى. سونىڭ ناتيجەسىندە بوس لاۋازىمدارعا ورنالاسۋ ءۇشىن كونكۋرسقا قاتىسۋشىلار سانى 2,7 ەسە ارتتى. بيىل e-Qyzmet ىرىكتەۋ جۇيەسىن بارلىق مەملەكەتتىك ورگانعا كەزەڭ-كەزەڭىمەن ەنگىزۋ جۇمىستارى باستالدى.
بۇدان بولەك، قاسىم-جومارت توقاەۆقا اگەنتتىكتىڭ مەملەكەتتىك قىزمەت كورسەتۋ ساپاسىن باقىلاۋ جانە باسقارۋ جۇيەسىن بيۋروكراتيادان ارىلتۋ سالالارىنا قاتىستى جۇمىستارى تۋرالى اقپارات بەرىلدى.
كەزدەسۋ سوڭىندا پرەزيدەنت سەرۆيستىك جانە ادامدارعا بەيىمدەلگەن مەملەكەتتىك اپپاراتتى قالىپتاستىرۋ، مەملەكەتتىك قىزمەتشىلەردىڭ كاسىبي بىلىكتىلىگىن ارتتىرۋ جانە مەملەكەتتىك قىزمەت جۇيەسىنە زاماناۋي تەحنولوگيالاردى ەنگىزۋ ءىسىن جالعاستىرۋدى تاپسىردى.
