Memleket basşysy Qasym-Jomart Toqaevtyŋ öŋırlerde infraqūrylymdy jaqsartu, öndırıs oryndaryn aşu jönınde tapsyrma bergen bolatyn. Osy baǧytta Türkıstan oblysynda auqymdy jūmys atqarylyp keledı.
Respublika künıne orai Türkıstan oblysynda äleumettık infraqūrylymdy damytuǧa jäne öŋırdıŋ öndırıstık äleuetın arttyruǧa baǧyttalǧan bırqatar nysan aşylyp, paidalanuǧa berıldı. Jobalar tūrǧyn üi, densaulyq saqtau, mädeniet, sport, önerkäsıp jäne auyl şaruaşylyǧy salalaryn qamtidy.
Ūlttyq mereke qarsaŋynda oblysta jalpy qūny 60 mlrd teŋgege juyq nysandardy ıske qosu josparlanǧan. Onyŋ ışınde 22,3 mlrd teŋgeden astamy biudjettık investisiialar esebınen, 35,6 mlrd teŋgeden astamy jeke investisiialar esebınen jüzege asyryldy. Jobalar aiasynda barlyǧy 648 adamdy jūmyspen qamtu közdelgen. Olardyŋ bırqataryna oblys äkımı Nūralhan Köşerov arnaiy qatysyp, tūrǧyndardy qūttyqtady.
Äleumettık infraqūrylymǧa basymdyq berılgen. Türkıstan qalasynda kezekte tūrǧan azamattarǧa arnalǧan 7 qabatty 14 tūrǧyn üidıŋ päterlerı tabystaldy. Saryaǧaş audanynda därıgerlık ambulatoriialar men feldşerlık-akuşerlık punkt, bırneşe audanda mädeniet üilerı, kıtaphanalar jäne sport keşenderı aşyldy. Sonymen qatar Saryaǧaş qalasyndaǧy ortalyq stadion qaita jaŋǧyrtudan ötıp, paidalanuǧa berıldı. Auyldyq eldı mekenderde tabiǧi gazben qamtu jūmystary jürgızıldı.
Jeke investisiialar esebınen jaŋa öndırıs oryndary ıske qosyluda. Ordabasy audanynda ırı qara mal süiegınen mai jäne jelatin komponentterın öndıretın käsıporyn men aliuminii kompozittık panelder zauyty aşyldy. Maqtaaral audanynda maqta maiyn öŋdeu, Jetısai jäne Otyrar audandarynda maqta öŋdeu käsıporyndary ıske qosyldy. Sairam audanynda bidai önımderın öŋdeitın diırmen men azyq-tülık qoimasy paidalanuǧa berıldı. Kentau qalasynda önerkäsıpke arnalǧan tehnologiialyq toraptar öndıretın zauyt aşyldy.
Būl jobalar öŋırde şikızatty tereŋ öŋdeuge, jergılıktı öndırıs kölemın arttyruǧa jäne jaŋa jūmys oryndaryn qūruǧa mümkındık beredı. Mäselen, jeke investisiialyq jobalar aiasynda 477 adamdy, biudjettık investisiialar esebınen jüzege asyrylatyn jobalar aiasynda 171 adamdy jūmyspen qamtu josparlanyp, mejege qol jettı.
Jalpy, Respublika künı qarsaŋynda paidalanuǧa berılgen nysandar Türkıstan oblysynyŋ äleumettık-ekonomikalyq damuyna serpın berıp, tūrǧyndarǧa qolaily jaǧdai jasauǧa, käsıpkerlıktı qoldauǧa jäne investisiialyq tartymdylyqty arttyruǧa baǧyttalǧan. Jyl soŋyna deiın taǧy da äleumettık nysandar men öndırıs oryndaryn aşu josparlanyp otyr.
