Türkıstan oblysynyŋ äkımı Nūralhan Köşerov Halyqaralyq qarttar künıne orai öŋırdıŋ ardagerlerımen merekelık kündı bırge ötkızdı.
Taŋǧy ziiarattan bastalǧan jüzdesu merekelık şaraǧa jalǧasyp, oblys äkımı künı boiy aǧa buyn ökılderınıŋ ortasynda boldy. Ardagerlermen emen-jarqyn äŋgımelesıp, olardyŋ aqyl-keŋesıne qūlaq asyp, aq batasyn aldy.
Merekelık kün Türkıstannyŋ törındegı Qoja Ahmet Iаsaui kesenesınen bastaldy. Oblys äkımı Nūralhan Köşerov ardagerlerdı tarihi kesene aldynda qarsy alyp, aǧa buyn ökılderımen bırge ziiarat jasady. Qasiettı mekende 50 ardagerdıŋ qatysuymen Qūran baǧyştalyp, eldıŋ amandyǧy, halyqtyŋ bırlıgı men ūrpaqtyŋ bolaşaǧy üşın dūǧa jasaldy. Türkıstannyŋ ruhani özegınde ötken būl sät merekelık künnıŋ mazmūnyna erekşe män qosty.
Keseneden keiın ardagerler men oblys äkımı «Qolönerşıler» ortalyǧyna bet aldy. Mūnda olar jergılıktı şeberlerdıŋ qolynan şyqqan ūlttyq naqyştaǧy būiymdar qoiylǧan järmeŋkenı aralady. Aǧaş pen temır öŋdeu, zergerlık öner jäne dästürlı qolöner baǧytynda eŋbek etıp jürgen şeberlerdıŋ jūmystarymen tanysty. Ardagerler ūlttyq oiyndarǧa da belsene qatysyp, asyq atyp, läŋgı teuıp, sadaq atty. Ūlttyq qūndylyqtardy ūlyqtaityn ortalyqta aǧa buyn ökılderı jas şeberlermen äŋgımelesıp, qolönerdı keiıngı ūrpaqqa jetkızudıŋ maŋyzyna toqtaldy.
Merekelık künnıŋ kelesı aialdamasy – Türkıstan muzykalyq drama teatry. Ardagerler oblys äkımımen bırge teatr sahnasyndaǧy «Vals korolı» qoiylymyn tamaşalady. Öner ordasyndaǧy jüzdesu aǧa buyn ökılderınıŋ ruhani tynyǧuyna mümkındık berıp, merekelık köŋıl küidı aişyqtai tüstı.
Teatrdan keiın oblys äkımı men ardagerler kelesı ıs-şara ötetın orynǧa qoǧamdyq avtobuspen bırge bardy. Jol üstınde aǧa buyn ökılderımen erkın äŋgıme örbıdı. Qariialar özderın tolǧandyrǧan mäselelerdı ortaǧa salyp, eldegı özgerıster men Türkıstannyŋ bügıngı kelbetı jönınde pıkır almasty.
Künnıŋ negızgı bölıgı «Qarttarym – qazynam» atty merekelık şaraǧa ūlasty. Jiynda oblys äkımı Nūralhan Köşerov ardagerlerdı Halyqaralyq qarttar künımen qūttyqtap, eldıŋ ösıp-örkendeuıne aǧa buyn ökılderınıŋ qosqan ülesın atap öttı.
– Qariiasyn qūrmetteu – qazaqtyŋ qanyna sıŋgen qasiet. «Qariiasy bar eldıŋ qazynasy bar» degen tämsıl de osydan şyqsa kerek. Bız ärqaşan qariiasyn qadırlep, ardagerın ardaqtaǧan tektı eldıŋ ūrpaǧymyz. Ardagerler – elımızdıŋ altyn qory. Täjıribesı mol aǧa buynnyŋ ömır joly bız üşın asa qūndy. Bügıngı beibıt ömır men el jetıstıkterınde sızderdıŋ eŋbekterıŋız zor. Memleket basşysy Qasym-Jomart Kemelūly Toqaev aǧa buynnyŋ airyqşa ornyn atap ötıp, ardagerlerge qūrmet körsetu men qamqorlyq jasaudy maŋyzdy mındetterdıŋ bırı retınde aiqyndap keledı. Būl – halqymyzdyŋ ǧasyrlardan jalǧasqan asyl dästürı. Aǧa buynnyŋ önegesın därıptep, olardyŋ elge sıŋırgen eŋbegın baǧalau – keiıngı ūrpaqtyŋ paryzy. Sızder – eldıŋ ötkenın bügınmen jalǧap otyrǧan altyn köpırsızder. Ärdaiym ortamyzda aman-esen jürıŋızder, – dedı oblys äkımı Nūralhan Köşerov.
Merekelık jiynda bırqatar ardagerge arnaiy marapattar tabystaldy. Is-şara barysynda jas ūrpaqqa önegelı eŋbek jolymen ülgı bolyp jürgen tyl eŋbekkerlerı, oblysqa eŋbegı sıŋgen eŋbek ardagerlerı men ziialy qauym ökılderı oblys äkımınıŋ, oblystyq mäslihattyŋ jäne oblystyq ardagerler keŋesınıŋ alǧys hattarymen marapattaldy. Oblystyq ardagerler keŋesınıŋ töraǧasy Jeŋısbek Mäulenqūlov «Ūrpaq sabaqtastyǧy: Ardagerler önegesı» taqyrybynda söz söilep, eldıŋ bırlıgı men qoǧamdyq tūraqtylyqty nyǧaitudaǧy aǧa buynnyŋ rölıne toqtaldy.
Qariianyŋ batasyn alu, onyŋ ömır jolyn tyŋdau, aqylyn arqau etu – ūrpaqtar arasyndaǧy altyn köpırdı bekemdei tüsetın igı dästür. Merekelık şara konserttık baǧdarlamamen jalǧasty.
Sondai-aq oblys äkımı bırneşe qariianyŋ şaŋyraǧyna arnaiy baryp, sälem berıp, aqsaqaldardyŋ aq batasyn aldy.
Bügınde Türkıstan oblysynda 212 myŋnan astam zeinet jasyndaǧy azamat bar. Öŋırde 3 Ūly Otan soǧysynyŋ ardagerı, 2 145 tyl eŋbekkerı tūrady. Sondai-aq oblysta 100 jastan asqan 39 qariia bar. Türkıstan oblysynda ardagerler men zeinetkerlerdı äleumettık qoldau, olardyŋ belsendı ömır süruıne jaǧdai jasau baǧytynda jüielı jūmystar jürgızılude. Jyl saiyn şamamen 7,8 myŋ ardager oblystaǧy ekı ardagerler üiınde 14 kün kölemınde sauyqtyru jäne demalu qyzmetterımen qamtylady. Sonymen qatar öŋırdıŋ barlyq audan-qalalarynda «Belsendı ūzaq ömır süru» ortalyqtary jūmys ısteidı. Būl ortalyqtarda jyl saiyn 15 myŋǧa juyq zeinetker türlı qyzmet türlerımen qamtyluda.
