تۇركيانىڭ باتىسىنداعى يزمير قالاسىنا جاقىن ورنالاسقان مەتاللۋرگيا زاۋىتىندا جارىلىستان قازا تاپقاندار سانى ارتتى، دەپ حابارلايدى "ادىرنا" ءتىلشىسى ۆۆس-گە سىلتەپ.
وقيعا سالدارىنان كەمىندە 17 جۇمىسشى قازا تاۋىپ، تاعى 12 جۇمىسشى جاراقات الدى.
بيلىك وكىلدەرىنىڭ مالىمەتىنشە، قازا تاپقاندار مەن زارداپ شەككەندەردىڭ بارلىعى – الياگا قالاسىنداعى ءىرى بولات ءوندىرۋشى كاسىپورىنداردىڭ ءبىرى «حاباش دەمير چەليك» زاۋىتىنىڭ جۇمىسشىلارى.
وقيعا ورنىنان تۇسىرىلگەن بەينەجازبالاردا كاسىپورىن اۋماعىنان ءورت شىعىپ، اسپانعا قويۋ ءتۇتىن كوتەرىلگەنى كورىنەدى.
جەرگىلىكتى گۋبەرناتور سۇلەيمان ەلباننىڭ ايتۋىنشا، جارىلىس تۇسكى ۋاقىتتا بولعان. جاڭا قازاندىقتى تاسىمالداپ بارا جاتقان كران قۇلاپ، ونىڭ ۇستىندەگى ماتەريالدار تومەندە ورنالاسقان پەشكە تۇسكەن. سالدارىنان جارىلىس بولعان.
ال زاۋىتتى باسقاراتىن كومپانيا وكىلدەرى اپات كاسىپورىنداعى ەلەكتر دوعالى پەشتەردىڭ بىرىنە جوسپارلى تەحنيكالىق قىزمەت كورسەتۋ كەزىندە بولعانىن ايتتى. وقيعا كۋاگەرلەرىنىڭ سوزىنشە، جارىلىس كەزىندە جەر قاتتى سىلكىنگەن. ءتىپتى، كەيبىر تۇرعىندار باستاپقىدا مۇنى جەر سىلكىنىسى دەپ ويلاعان.
يزمير گۋبەرناتورى سۇلەيمان ەلبان ءۇيىندى استىندا ءالى دە ادامدار بولۋى مۇمكىن ەكەنىن ايتتى.
