قازاقستاندا بەنزين مەن ديزەل وتىنى باعاسىنىڭ كۇرت قىمباتتاۋىنا ەشقانداي نەگىز جوق، دەپ حابارلايدى "ادىرنا".
بۇل تۋرالى ەنەرگەتيكا ءمينيسترى ەرلان اقكەنجەنوۆ ۇكىمەت وتىرىسىنان كەيىن وتكەن بريفينگتە ايتتى.
ءمينيستردىڭ ايتۋىنشا، 2024 جىلعى اقپاننان بەرى ەلىمىزدە جانار-جاعارمايدىڭ كوتەرمە جانە بولشەك ساۋداداعى باعاسى مەملەكەتتىك رەتتەۋدەن شىعارىلعان. قازىر باعا ىشكى سۇرانىس پەن ۇسىنىسقا، سونداي-اق نارىقتاعى باسەكەلەستىككە بايلانىستى قالىپتاسادى.
ۆەدومستۆو باسشىسىنىڭ دەرەگىنشە، قازىرگى ۋاقىتتا اي-92 ماركالى بەنزيننىڭ ءليترى 253-271 تەڭگە ارالىعىندا ساتىلىپ جاتىر. ال ديزەل وتىنىنىڭ باعاسى 356-367 تەڭگە شاماسىندا.
ەرلان اقكەنجەنوۆ جانارماي قۇيۋ بەكەتتەرىندەگى باعا ايىرماشىلىعى ولاردىڭ ءونىمدى وتكىزۋگە جۇمسايتىن شىعىندارىنا بايلانىستى ەكەنىن ءتۇسىندىردى.
سونىمەن قاتار مينيستر ەلدەگى جانار-جاعارماي قورى جەتكىلىكتى ەكەنىن اتاپ ءوتتى. قازىرگى ۋاقىتتا بەنزين مەن ديزەل وتىنىنىڭ ارقايسىسىنان 400 مىڭ توننادان استام قور جيناقتالعان. مۇناي وڭدەۋ زاۋىتتارى شتاتتىق رەجيمدە جۇمىس ىستەپ، ءونىمدى وڭىرلەرگە جەتكىزۋ قالىپتى تارتىپپەن جۇزەگە اسىرىلىپ جاتىر.
ءمينيستردىڭ سوزىنشە، جانارماي باعاسىنىڭ كۇرت ءوسۋى بايقالعان جاعدايدا مەملەكەت نارىقتى تۇراقتاندىرۋ ءۇشىن قاجەتتى شارالاردى قابىلدايدى.
