تۇركىستان قالاسىندا ۇلى اقىن، ويشىل ءارى اعارتۋشى اباي قۇنانبايۇلىنىڭ تۋعان كۇنىنە وراي ەسكەرتكىشكە گۇل شوقتارىن قويۋ ءراسىمى ءوتتى. ءىس-شاراعا تۇركىستان وبلىسىنىڭ اكىمى نۇرالحان كوشەروۆ، زيالى قاۋىم وكىلدەرى، ارداگەرلەر، مادەنيەت جانە ونەر قايراتكەرلەرى، جاستار مەن قالا تۇرعىندارى قاتىستى.
الدىمەن سالتاناتتى جيىنعا قاتىسۋشىلار ۇلى اقىننىڭ رۋحىنا تاعزىم ەتىپ، ەسكەرتكىشىنە گۇل شوقتارىن قويدى.
ءىس-شارادا العىسوز العان تۇركىستان وبلىسىنىڭ اكىمى نۇرالحان كوشەروۆ جيىنعا قاتىسۋشىلاردى اباي كۇنىمەن قۇتتىقتاپ، ۇلى اقىننىڭ قازاق حالقىنىڭ رۋحاني ومىرىندەگى ايرىقشا ورنىنا توقتالدى.
– بۇگىن تۇركىستان تورىندە رۋحاني ءمانى بار جيىندا جولىعىپ تۇرمىز. 2020 جىلدان باستاپ اباي قۇنانبايۇلىنىڭ تۋعان كۇنىنە وراي 10 تامىز – «اباي كۇنى» رەتىندە اتاپ وتىلەدى. وتكەن جىلى اقىننىڭ 180 جىلدىق مەرەيتويى ەل كولەمىندە جوعارى دەڭگەيدە اتالىپ ءوتتى. بيىلدا بۇل ءۇردىس جالعاسىن تاۋىپ، اباي شىعارماشىلىعىن ناسيحاتتاۋ باعىتىنداعى شارالار ەل اۋماعىندا كەڭىنەن ۇيىمداستىرىلۋدا. اباي كۇنى – دانىشپان اقىننىڭ ەسىمىن ۇلىقتايتىن عانا ەمەس، حالقىمىزدىڭ رۋحاني جاڭعىرۋىن، ۇلتتىق بولمىسى مەن ءبىلىم-پاراساتىن ايشىقتايتىن مەرەكە. پرەزيدەنتىمىز قاسىم-جومارت كەمەلۇلى توقاەۆ اباي مۇراسىن ۇلىقتاۋ – ۇلتتى ۇيىستىراتىن، جاس ۇرپاقتىڭ ساناسىن تاربيەلەيتىن ماڭىزدى قۇندىلىق ەكەنىن ءاردايىم ايتىپ كەلەدى. سوندىقتان ابايدى تانۋ – ءوزىمىزدى تانۋ، ابايدى وقۋ – ەلدىڭ ەرتەڭىنە قىزمەت ەتۋ. ۇلى اباي ء«بىرىڭدى قازاق ءبىرىڭ دوس، كورمەسەڭ – ءىستىڭ ءبارى بوس» دەپ ەلدى بىرلىككە شاقىرعان. بۇل ءبىزدىڭ باستى ۇستانىمىز بولۋعا ءتيىس. «اباي كۇنى» قۇتتى بولسىن! اباي اماناتىنا ادال بولىپ، ەلگە ادال قىزمەت ەتە بەرەيىك! – دەدى نۇرالحان ورالبايۇلى.
ءىس-شارا بارىسىندا تۇركىستان قالالىق بالالار مەن جاسوسپىرىمدەر ورتالىعىنىڭ وقۋشىلارى ونەر كورسەتىپ، ابايدىڭ ولەڭدەرىنەن ادەبي كومپوزيتسيا ۇسىندى. سونداي-اق ابايدىڭ «كوزىمنىڭ قاراسى» اتتى ءانى ورىندالدى.
بۇدان بولەك، «اباي الەمى: ويدان – ونەگەگە»» تاقىرىپتىق كىتاپ جانە سۋرەت كورمەسى ۇيىمداستىرىلدى. كورمەدە اقىننىڭ ءومىرى مەن شىعارماشىلىعىنا ارنالعان ادەبيەتتەر مەن كوركەم تۋىندىلار كوپشىلىك نازارىنا ۇسىنىلدى.
ۇرپاقتار ساباقتاستىعىن نىعايتۋ ماقساتىندا تۇركىستان وبلىسىنىڭ اكىمى نۇرالحان كوشەروۆ پەن زيالى قاۋىم وكىلدەرى جاستارعا جانە قالا تۇرعىندارىنا قازاق ادەبيەتىنىڭ كورنەكتى تۋىندىسى، مۇحتار اۋەزوۆتىڭ «اباي جولى» رومان-ەپوپەياسىنىڭ كوپتومدىعىن تارتۋ ەتتى.
ايتا كەتەيىك، قازىرگى تاڭدا تۇركىستان وبلىسىندا اباي ەسىمىمەن 1 اۋىلدىق وكرۋگ، 4 ەلدىمەكەن، 110 كوشە، 15 مەكتەپ اتالادى. ۇلى اقىننىڭ قۇرمەتىنە 9 ەسكەرتكىش، 11 بيۋست ورناتىلعان. بۇل باعىتتاعى جۇمىستار جوسپارعا سايكەس تۇراقتى تۇردە جۇرگىزىلەتىن بولادى.
