Türkıstan qalasynda ūly aqyn, oişyl ärı aǧartuşy Abai Qūnanbaiūlynyŋ tuǧan künıne orai eskertkışke gül şoqtaryn qoiu räsımı öttı. Is-şaraǧa Türkıstan oblysynyŋ äkımı Nūralhan Köşerov, ziialy qauym ökılderı, ardagerler, mädeniet jäne öner qairatkerlerı, jastar men qala tūrǧyndary qatysty.
Aldymen saltanatty jiynǧa qatysuşylar ūly aqynnyŋ ruhyna taǧzym etıp, eskertkışıne gül şoqtaryn qoidy.
Is-şarada alǧysöz alǧan Türkıstan oblysynyŋ äkımı Nūralhan Köşerov jiynǧa qatysuşylardy Abai künımen qūttyqtap, ūly aqynnyŋ qazaq halqynyŋ ruhani ömırındegı airyqşa ornyna toqtaldy.
– Bügın Türkıstan törınde ruhani mänı bar jiynda jolyǧyp tūrmyz. 2020 jyldan bastap Abai Qūnanbaiūlynyŋ tuǧan künıne orai 10 tamyz – «Abai künı» retınde atap ötıledı. Ötken jyly aqynnyŋ 180 jyldyq mereitoiy el kölemınde joǧary deŋgeide atalyp öttı. Biylda būl ürdıs jalǧasyn tauyp, Abai şyǧarmaşylyǧyn nasihattau baǧytyndaǧy şaralar el aumaǧynda keŋınen ūiymdastyryluda. Abai künı – danyşpan aqynnyŋ esımın ūlyqtaityn ǧana emes, halqymyzdyŋ ruhani jaŋǧyruyn, ūlttyq bolmysy men bılım-parasatyn aişyqtaityn mereke. Prezidentımız Qasym-Jomart Kemelūly Toqaev Abai mūrasyn ūlyqtau – ūltty ūiystyratyn, jas ūrpaqtyŋ sanasyn tärbieleitın maŋyzdy qūndylyq ekenın ärdaiym aityp keledı. Sondyqtan Abaidy tanu – özımızdı tanu, Abaidy oqu – eldıŋ erteŋıne qyzmet etu. Ūly Abai «Bırıŋdı qazaq bırıŋ dos, körmeseŋ – ıstıŋ bärı bos» dep eldı bırlıkke şaqyrǧan. Būl bızdıŋ basty ūstanymyz boluǧa tiıs. «Abai künı» qūtty bolsyn! Abai amanatyna adal bolyp, elge adal qyzmet ete bereiık! – dedı Nūralhan Oralbaiūly.
Is-şara barysynda Türkıstan qalalyq balalar men jasöspırımder ortalyǧynyŋ oquşylary öner körsetıp, Abaidyŋ öleŋderınen ädebi kompozisiia ūsyndy. Sondai-aq Abaidyŋ «Közımnıŋ qarasy» atty änı oryndaldy.
Būdan bölek, «Abai älemı: Oidan – önegege»» taqyryptyq kıtap jäne suret körmesı ūiymdastyryldy. Körmede aqynnyŋ ömırı men şyǧarmaşylyǧyna arnalǧan ädebietter men körkem tuyndylar köpşılık nazaryna ūsynyldy.
Ūrpaqtar sabaqtastyǧyn nyǧaitu maqsatynda Türkıstan oblysynyŋ äkımı Nūralhan Köşerov pen ziialy qauym ökılderı jastarǧa jäne qala tūrǧyndaryna qazaq ädebietınıŋ körnektı tuyndysy, Mūhtar Äuezovtıŋ «Abai joly» roman-epopeiasynyŋ köptomdyǧyn tartu ettı.
Aita keteiık, qazırgı taŋda Türkıstan oblysynda Abai esımımen 1 auyldyq okrug, 4 eldımeken, 110 köşe, 15 mektep atalady. Ūly aqynnyŋ qūrmetıne 9 eskertkış, 11 biust ornatylǧan. Būl baǧyttaǧy jūmystar josparǧa säikes tūraqty türde jürgızıletın bolady.
