اقش پرەزيدەنتى دونالد ترامپ 10 ناۋرىزعا قاراعان ءتۇنى وتكەن ءباسپاسوز بريفينگىندە يرانداعى مەكتەپكە جاسالعان شابۋىلعا قاتىستى مالىمدەمە جاساپ، وقيعاعا يراندىقتاردىڭ وزدەرى سەبەپ بولدى دەگەن پىكىر ايتتى. ونىڭ سوزىنشە، مەكتەپكە جاسالعان شابۋىل سالدارىنان 165 قىز بالا قازا تاپقان.
ترامپ بۇل شابۋىلعا «توماگاۆك» زىمىراندارى قولدانىلعانى تۋرالى اقپاراتقا قاتىستى پىكىر ءبىلدىرىپ، مۇنداي زىمىرانداردى كەز كەلگەن ەل ساتىپ الىپ، پايدالانا الاتىنىن، سونىڭ ىشىندە يران دا قولدانۋى مۇمكىن ەكەنىن ايتقان.
الايدا بىرقاتار ساراپشىلار مەن امەريكالىق بۇقارالىق اقپارات قۇرالدارى بۇل مالىمدەمەگە كۇمان كەلتىردى. Clash Report باسىلىمىنىڭ مالىمەتىنشە، «توماگاۆك» زىمىراندارى نەگىزىنەن اقش اسكەري-تەڭىز كۇشتەرىنىڭ قارۋ-جاراعىنا جاتادى. سونىمەن قاتار مۇنداي زىمىرانداردىڭ بەلگىلى ءبىر سانى تەك اقش-تىڭ ءۇش وداقتاسىندا – ۇلىبريتانيا، اۆستراليا جانە جاپونيادا عانا بار ەكەنى ايتىلدى. ساراپشىلاردىڭ پىكىرىنشە، يراندا مۇنداي قارۋدىڭ بولۋى وتە ەكىتالاي.
وسىعان بايلانىستى كەيبىر امەريكالىق باق ترامپتىڭ مالىمدەمەسىن سىنعا الىپ، ونىڭ سوزدەرى قوعامدا قىزۋ پىكىرتالاس تۋعىزعانىن جازدى.
سونىمەن قاتار ترامپ يراننىڭ امەريكالىق-يزرايلدىك وپەراتسيا باستالعاننان كەيىن بىردەن بەرىلمەگەنىنە نارازىلىق ءبىلدىرىپ، تەگەرانعا قاتاڭ شارالار قولدانىلۋى مۇمكىن ەكەنىن ەسكەرتتى.
ساراپشىلاردىڭ پىكىرىنشە، بۇل مالىمدەمە حالىقارالىق ساياساتتاعى شيەلەنىستى ودان ءارى كۇشەيتۋى مۇمكىن.
