قىتايدا باعالى قاعازدار نارىعىن رەتتەۋ جونىندەگى كوميسسيانىڭ سىبايلاس جەمقورلىققا قارسى ءبولىمىنىڭ بۇرىنعى باسشىسى ۆان حۋەيمين ءولىم جازاسىنا كەسىلدى. الايدا ۇكىمدى ورىنداۋ ەكى جىلعا كەيىنگە قالدىرىلدى. بۇل تۋرالى «سينحۋا» اگەنتتىگى جازدى، دەپ حابارلايدى «ادىرنا» ءتىلشىسى.
چەندۋ قالاسىنىڭ سوتى ۆان حۋەيميننىڭ 1998 جىلدان 2025 جىلعا دەيىن پارا العانىن انىقتاعان. ول ءار جىلدارى مەملەكەتتىك بانكتە، شىڭجاڭداعى مەملەكەتتىك ورگانداردا جانە باعالى قاعازدار نارىعىن رەتتەيتىن ۇلتتىق مەكەمەدە قىزمەت اتقارعان.
ول پارا ءۇشىن كومپانيالار مەن جەكە تۇلعالارعا بيزنەس جۇرگىزۋگە جانە قارجى تارتۋعا كومەكتەسكەن. زاڭسىز الىنعان اقشا مەن مۇلىكتىڭ جالپى سوماسى 436 ميلليون يۋاننان اسقان. بۇل شامامەن 29,5 ميلليارد تەڭگەگە تەڭ.
سوت پارا كولەمىن اسا ءىرى، ال مەملەكەت پەن قوعامعا كەلتىرىلگەن زياندى ەرەكشە اۋىر دەپ باعالاعان. سوعان قاراماستان، جەڭىلدەتەتىن ءمان-جايلارعا بايلانىستى ءولىم جازاسىن ورىنداۋ كەيىنگە قالدىرىلعان.
سوت كەيبىر قىلمىستىق ارەكەتتەردىڭ سوڭىنا دەيىن جەتكىزىلمەگەنىن ەسكەرگەن. بۇرىنعى شەنەۋنىك كىناسىن مويىنداپ، جاساعان ىسىنە وكىنگەن جانە تەرگەۋ ورگاندارىنا بۇرىن بەلگىسىز بولعان پارا الۋ دەرەكتەرى تۋرالى مالىمەت بەرگەن. سونداي-اق زاڭسىز الىنعان قاراجاتتىڭ ءبىر بولىگى مەملەكەتكە قايتارىلعان. بۇدان بولەك، ونىڭ بارلىق جەكە مۇلكى تاركىلەنەدى.
قىتايدا ءولىم جازاسىن ورىنداۋ ەكى جىلعا كەيىنگە قالدىرىلعان جاعدايدا جازا ادەتتە ءومىر بويىنا باس بوستاندىعىنان ايىرۋعا اۋىستىرىلادى. الايدا ۆان حۋەيمينگە قاتىستى سوت جازا مەرزىمىن قىسقارتۋعا جانە مەرزىمىنەن بۇرىن بوساتۋعا جول بەرىلمەيتىنىن الدىن الا بەلگىلەدى.
