قىتاي استاناسى بەيجىڭدە بولعان جويقىن سۋ تاسقىنى سالدارىنان 44 ادام قازا تاۋىپ، 9 تۇرعىن ءىز-ءتۇزسىز جوعالىپ كەتكەن، دەپ حابارلايدى "ادىرنا" ۇلتتىق پورتالى Chinanews اقپارات اگەنتتىگىنە سىلتەپ.
بەيجىڭ قالاسى اكىمدىگىنىڭ مالىمەتىنشە، قازا تاپقانداردىڭ 31-ءى ميۋن اۋدانىنداعى قارتتار ۇيىندە بولعان. ال جوعالعانداردىڭ ءبىرى – قۇتقارۋشى.
سۋ تاسقىنىنان اسىرەسە ميۋن، حۋايجوۋ جانە يانتسين اۋداندارى زارداپ شەككەن. بۇل وڭىرلەردە بىرنەشە كۇن بويى تولاسسىز نوسەر جاۋىن جاۋىپ، وزەندەر ارناسىنان تاسىپ، ەلدىمەكەندەردى سۋ باستى.
قىتاي توراعاسى سي تسزينپين 28 شىلدەدە سۋ تاسقىنىنا قارسى جانە اپاتتان قۇتقارۋ جۇمىستارىنا بايلانىستى ارنايى نۇسقاۋ بەرىپ، تابيعي اپاتتار بەيجىڭ، حەبەي، تسزيلين، شاندۋن سياقتى ايماقتاردا اۋىر ادام شىعىنى مەن مۇلىكتىك زالالعا سەبەپ بولعانىن مالىمدەدى. ول حالىقتىڭ ءومىرى مەن مۇلكىن قورعاۋ ءۇشىن بارلىق كۇش-جىگەردى جۇمىلدىرۋ قاجەت ەكەنىن باسا ايتتى.
قازىرگى تاڭدا 80 مىڭنان استام تۇرعىن ەۆاكۋاتسيالانعان. قالپىنا كەلتىرۋ جانە كومەك كورسەتۋ شارالارىنا مەملەكەت تاراپىنان اۋقىمدى قارجى بولىنۋدە. ۇلتتىق دامۋ جانە رەفورمالار جونىندەگى مەملەكەتتىك كوميتەت بەيجىڭگە 2 ميلليارد يۋان بولسە، قارجى جانە توتەنشە جاعدايلار مينيسترلىكتەرى ەلدەگى 9 وڭىرگە 3,5 ميلليارد يۋان كولەمىندە كومەك كورسەتۋ ءۇشىن قاراجات بولگەن.
