بەلارۋستە نارازىلىق شارالارى جالعاسىپ جاتقان شاقتا الەكساندر لۋكاشەنكو انت بەرىپ، پرەزيدەنت قىزمەتىنە كىرىستى. يناۋگۋراتسيا ءراسىمىنىڭ بولاتىنىن كوپ ادام بىلمەگەن. ونىڭ وتەتىنى جايلى الدىن الا حابارلانبادى، دەپ جازادى centralasian.org.
مەملەكەتتىك "بەلتا" اگەنتتىگىنىڭ جازۋىنشا، "سالتاناتتى ءراسىم" 23 قىركۇيەكتە تاۋەلسىزدىك سارايىندا وتكەن. زاڭ بويىنشا، پرەزيدەنتتىڭ انت بەرۋ شاراسىنان رەسپۋبليكالىق تەلەارنالار مەن راديولاردان ترانسلياتسيا جاسالۋى كەرەك. بىراق جەرگىلىكتى تەلەارنالاردان انت بەرۋ ءراسىمى كورسەتىلمەگەن.
مەملەكەتتىك اگەنتتىكتەردىڭ حابارلاۋىنشا، لۋكاشەنكو يناۋگۋراتسياسىنا جۇزدەگەن ادام شاقىرىلعان. ولاردىڭ اراسىندا جوعارى لاۋازىمدى تۇلعالار، دەپۋتاتتار، رەسپۋبليكا كەڭەسىنىڭ مۇشەلەرى، مەملەكەتتىك ورگان باسشىلارى، جەرگىلىكتى اتقارۋ ورگان وكىلدەرى، اقپارات قۇرالدارى، عىلىم، مادەنيەت، سپورت قايراتكەرلەرى بار.
لۋكاشەنكو بەلارۋس تىلىندە انت بەرگەن. بۇدان سوڭ انت بەرگەنى جايلى اكتىگە قول قويىپ، ورتالىق سايلاۋ كوميسسياسىنىڭ ءتورايىمى ليديا ەرموشينا وعان بەلارۋس رەسپۋبليكاسىنىڭ تولقۇجاتىن تاپسىرعان.
"ناستوياششەە ۆرەميا" ارناسىنىڭ حابارلاۋىنشا، سارسەنبى كۇنى تاڭەرتەڭنەن باستاپ مينسك تۇرعىندارى تاۋەلسىزدىك سارايى الدىندا اسكەري تەحنيكا مەن ساربازدار تۇرعانىن كورگەن. يناۋگراتسيا جايلى سىبىس شىقسا دا ساياساتكەرلەر ونى جوققا شىعارعان.
ەلدە 9 تامىزدان بەرى نارازىلىق شارالارى جالعاسىپ كەلەدى. نارازىلار پرەزيدەنت سايلاۋىنىڭ قورىتىندىسى بۇرمالاندى دەپ ەسەپتەيدى. ولار لۋكاشەنكو وتستاۆكاعا كەتىپ، ەلدە جاڭادان ءادىل سايلاۋى ءوتۋى ءتيىس دەيدى.
66 جاستاعى بەلارۋس باسشىسى نارازىلىققا شىققانداردى كۇشپەن باسىپ، كوپتەگەن ازاماتتار قاماۋ ورىندارىندا ازاپتاۋعا ۇشىراعانىن ايتقان.
بۇعان دەيىن وپپوزيتسيا جەتەكشىسى سۆەتلانا تيحانوۆسكايا يناۋگۋراتسيا وتكىزۋ زاڭسىز بولادى دەپ مالىمدەگەن.
