VI دۇنيەجۇزىلىك كوشپەندىلەر ويىندارىندا ەل نامىسىن قورعاپ، جۇلدەلى ورالعان الماتى وبلىسىنىڭ سپورتشىلارى ماراپاتتالدى. قىرعىزستاندا وتكەن حالىقارالىق دودادا بابى مەن باعى قاتار جانعان جۇلدەگەرلەرگە الماتى وبلىسىنىڭ اكىمى شىڭعىس ءارىنوۆ العىس ايتىپ، ءىلتيپات ءبىلدىردى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.
“كوشپەندىلەر ويىندارى – حالقىمىزدىڭ ۇلتتىق بولمىسىن، سالت-ءداستۇرىن، ات ۇستىندەگى ونەرىن الەمگە تانىتاتىن اسا ماڭىزدى حالىقارالىق جارىس. الەمنىڭ 100-دەن استام ەلىنەن كىل مىقتىلار قاتىسقان ءدۇبىرلى دودادا ۇلتتىق قۇراما جالپىكوماندالىق ەسەپتە ءبىرىنشى ورىنعا يە بولدى. بۇل – ەلىمىز ءۇشىن ۇلكەن ماقتانىش. ءبىز ءۇشىن تاعى ءبىر ەرەكشە قۋانىش – ەل قۇراماسىنىڭ ساپىندا الماتى وبلىسى اتىنان ونەر كورسەتكەن سپورتشىلاردىڭ جۇلدەلى ورىندارعا يە بولۋى. بۇل رەتتە سپورتشىلارىمىزدىڭ جەڭىسىنە جول اشقان باپكەرلەردىڭ دە ەڭبەگىن ەرەكشە اتاپ وتكىم كەلەدى. وڭىردە ۇلتتىق سپورتتى دامىتۋعا، بالالار مەن جاسوسپىرىمدەر اراسىنان سپورت رەزەرۆىن قالىپتاستىرۋعا ەرەكشە باسىمدىق بەرىلىپ كەلەدى. سوڭعى جىلدارى ۇلتتىق سپورتقا بەت بۇرعان جاستاردىڭ قاتارى ايتارلىقتاي ارتتى. الداعى ۋاقىتتا ۇلتتىق سپورتتى كەڭىنەن دارىپتەۋگە، ونى بۇقارالىق سيپاتقا جەتكىزۋگە، جاس تالانتتاردى ىرىكتەپ، مىقتى سپورت رەزەرۆىن قالىپتاستىرۋعا جانە ەل ابىرويىن اسقاقتاتاتىن ساڭلاقتارعا جان-جاقتى قولداۋ كورسەتۋگە باسىمدىق بەرەمىز. ۇلتتىق سپورتتىڭ وركەندەۋى زاماناۋي ءارى قولجەتىمدى ينفراقۇرىلىمعا دا تىكەلەي بايلانىستى، – دەدى شىڭعىس سايرانۇلى.
سونداي-اق سپورت نىساندارىن سالۋ مەن جاڭعىرتۋ جانە ءاربىر تۇرعىننىڭ سپورتپەن شۇعىلدانۋىنا قولايلى ورتا قالىپتاستىرۋ باعىتىنداعى جۇمىستار جۇيەلى تۇردە جالعاساتىنىن تىلگە تيەك ەتتى.
ايماق باسشىسى ساناۋلى كۇندەردەن سوڭ جالاۋى جەلبىرەيتىن حح ازيا ويىندارىنا قازاقستان قۇراماسى ساپىندا الماتى وبلىسىنىڭ 24 وكىلى سپورتتىڭ 13 تۇرىنەن باق سىنايتىنىن ايتىپ، بارشا تۇرعىنداردى وسى بايراقتى باسەكەگە قاتىساتىن جەرلەستەرىمىزگە قولداۋ كورسەتۋگە شاقىردى.
بۇگىنگى ءىس-شارا بارىسىندا «الاتاۋ» فەدەراتسياسىنىڭ پرەزيدەنتى ءسابيت قاسەنوۆ، كوكپاردان VI دۇنيەجۇزىلىك كوشپەندىلەر ويىندارىنىڭ تورەشىسى ەلدوس تىلەبالديەۆ جانە الامان بايگەدەن، كوكپاردان، كوكبورىدەن جۇلدەلى ورىندارعا يە بولعان سپورتشىلارعا پرەزيدەنتىڭ “العىس حاتى” تابىستالدى. وزگە سپورتشىلار مەن باپكەرلەر دە وبلىس اكىمىنىڭ “قۇرمەت گراموتاسى” جانە “العىس حاتپەن” ماراپاتتالدى.
ءدۇبىرلى دودادا كوك بايراقتى جەلبىرەتىپ، جەڭىسپەن ورالعان سپورتشىلار وزدەرىن ەلەپ-ەسكەرگەن مەملەكەت باسشىسى مەن وبلىس اكىمىنە العىس ءبىلدىردى.
