استانالىق رايىمبەك كولىكتىڭ قوزعالتقىشىن ورناتۋ، كولىك بولشەكتەرىن قۇراستىرۋ، ەلەكتر سىمدارىن جالعاۋ سىندى كۇردەلى جۇمىستاردى ەرتە جاستان ۇيرەنگەن. قازىر اعالارىنىڭ جانىندا ەڭبەك ەتىپ، وتباسىلىق كاسىپتىڭ دامۋىنا ءوز ۇلەسىن قوسىپ ءجۇر.
رايىمبەك بۇل سالاعا كەزدەيسوق كەلمەگەن. اۆتوكولىككە دەگەن قىزىعۋشىلىعى 12 جاسىندا اعالارىنىڭ شەبەرحاناسىندا جۇرگەن كەزىنەن باستالعان. العاشىندا كولىكتىڭ قالاي جۇمىس ىستەيتىنىن باقىلاپ، كەيىن بولشەكتەۋ مەن قايتا قۇراستىرۋدى ۇيرەنگەن. سودان بەرى قولىنان قۇرال-سايمانىن تاستاعان ەمەس.
بۇگىندە اعايىندىلاردىڭ ورتاق كاسىبى – كولىك جوندەۋ، قوسالقى بولشەكتەر ساتۋ جانە اۆتوكولىكتى بولشەكتەۋ ورتالىعى. اپاتقا ۇشىراعان، جوندەۋگە كەلمەيتىن كولىكتەر اكەلىنىپ، ولاردىڭ جارامدى بولشەكتەرى اجىراتىلادى. ماماندار ءار بولشەكتىڭ جاعدايىن تەكسەرىپ، قايتا پايدالانۋعا بولاتىندارىن سۇرىپتايدى. ال جارامسىزدارى كادەگە جاراتۋعا جىبەرىلەدى. رايىمبەك تە وسى جۇمىستىڭ قىر-سىرىن مەڭگەرىپ كەلەدى.
جاس شەبەر جاقىندا تاعى ءبىر جاڭا جوبانى قولعا العان. ول كولىكتىڭ شاناق بولىگىن جوندەپ، ەلەكتر جۇيەسىن تولىق رەتكە كەلتىرۋدى جوسپارلاپ وتىر. باستاپقىدا كۇردەلى جۇمىستان جۇرەكسىنگەنىن دە جاسىرمايدى.
«العاشىندا قورقىنىش بولادى. سىندىرىپ المايمىن با، ءبۇلدىرىپ المايمىن با دەپ ويلايسىڭ. بىراق ۋاقىت وتە كەلە وزىڭە سەنىمدى بولۋ كەرەك ەكەنىن تۇسىنەسىڭ. بىلمەگەن نارسەڭدى بىلەتىن ادامنان سۇراعان دۇرىس»،- دەيدى رايىمبەك.
ءبىر قىزىعى، ءجاسوسپىرىم بۇعان دەيىن ساۋدامەن اينالىسىپ، ۆەلوسيپەد تە قۇراستىرىپ كورگەن. ال اۆتومەحانيكاعا دەگەن قىزىعۋشىلىعى اعالارىنىڭ جانىندا ءجۇرىپ ارتا تۇسكەن. ۇلكەندەرىنەن ۇيرەنگەن تاجىريبەسى بۇگىندە وزىنە ۇلكەن كومەك.
رايىمبەك ءۇشىن اۋلەتتىڭ ۇلكەندەرى – ءارى ارىپتەس، ءارى ۇستاز. ون شاقتى ادام ەڭبەك ەتەتىن ورتالىقتا اركىم ءوز مىندەتىن اتقارادى. مۇندا جۇمىستىڭ ناقتى اياقتالۋ ۋاقىتى ءاردايىم بىردەي ەمەس. سەبەبى كولىكتى ساپالى جوندەۋ ءۇشىن اسىعىستىققا جول بەرۋگە بولمايدى.
جاس شەبەر ەڭبەگىنىڭ العاشقى تابىسىن دا ۇمىتقان جوق. ورتاڭعى دەفلەكتوردى اۋىستىرىپ بەرگەنى ءۇشىن العاش رەت بەس مىڭ تەڭگە العان. قازىر اي سايىنعى تابىسى شامامەن 500 مىڭ تەڭگەگە جۋىق. تاپقان اقشاسىن قاجەتتىلىگىنە جۇمساپ، ءبىر بولىگىن جيناۋعا تىرىسادى.
كولىك يەلەرى دە جاس شەبەردىڭ جۇمىسىنا وڭ باعا بەرەدى. ورتالىققا كەلگەن جۇرگىزۋشىلەر ونىڭ كەڭەسىنە قۇلاق اسىپ، كولىكتەرىن سەنىپ تاپسىرادى. رايىمبەك ءار جۇمىستى ءتۇسىندىرىپ، اقاۋدىڭ سەبەبىن انىقتاۋعا كومەكتەسەدى.
ەڭبەكپەن قاتار ءبىلىم الۋدى دا ۇمىتپايدى. قازىر ول 10-سىنىپتا وقيدى. ال اعالارى ونىڭ بولاشاعىنان ۇلكەن ءۇمىت كۇتەدى. ەلەكتر كولىكتەرىنە سۇرانىس ارتىپ كەلە جاتقاندىقتان، رايىمبەكتى شەتەلدە وقىتىپ، زاماناۋي تەحنولوگياعا باۋلىماق.
وتباسىنداعى تاربيە دە ونىڭ ومىرىندە ماڭىزدى ورىن الادى. رايىمبەك وزىنەن كەيىنگى باۋىرلارىنا ۇلگى بولىپ، ولارعا دا ءوز ۇيرەنگەنىن ۇيرەتۋدە. اعالارىنىڭ ايتۋىنشا، بالانىڭ بوس ۋاقىتىن ءتيىمدى وتكىزىپ، پايدالى ىسپەن اينالىسقانى ماڭىزدى.
جاس شەبەر جۇمىس پەن وقۋدى عانا ەمەس، سپورتتى دا قاتار الىپ ءجۇر. بوس ۋاقىتىندا الاتاۋ سپورت كەشەنىنە بارىپ، جۇزۋمەن اينالىسادى. ونىڭ ايتۋىنشا، 45 مينۋتتا مىڭ مەتردەن استام قاشىقتىقتى ءجۇزىپ وتەدى.
رايىمبەكتىڭ ارمانى – بولاشاقتا ۇلكەن اۆتوسەرۆيس ورتالىعىن اشۋ. العان ءبىلىمى مەن تاجىريبەسىن جەتىلدىرىپ، وتباسىلىق كاسىپتى ودان ءارى دامىتۋعا نيەتتى. بۇگىندە ول سول ماقساتىنا جەتۋ ءۇشىن ەرتە جاستان ەڭبەك ەتىپ، ءار كۇنىن تاجىريبە جيناۋعا ارناپ كەلەدى.
قازىردىڭ وزىندە كاسىبىنىڭ قىر-سىرىن مەڭگەرگەن رايىمبەك ءۇشىن باستى جەتىستىك – تاباندىلىق پەن تىنىمسىز ىزدەنىس. ونىڭ تەمىر تۇلپارعا دەگەن قىزىعۋشىلىعى بولاشاقتا ۇلكەن كاسىپكە اينالارىنا سەنىم مول.
گۇلبارشىن نۇرحان
«ادىرنا» ۇلتتىق پورتالى
