بۇگىندە الەمدىك تەحنولوگيالىق الپاۋىت كومپانيالاردا ەڭبەك ەتەتىن قازاق جاستارىنىڭ قاتارى ارتىپ كەلەدى. سولاردىڭ ءبىرى – شىمكەنت قالاسىندا دۇنيەگە كەلگەن نۇرلى كۇزدىكباي. قازىرگى تاڭدا ول لوندوندا ورنالاسقان Amazon كومپانياسىندا داتا-اناليتيك قىزمەتىن اتقارادى.
نۇرلى كۇزدىكبايدىڭ كاسىبي جولى بىردەن ءىت سالاسىنان باستالعان جوق. ول باستاپقىدا قۇرىلىس ينجەنەرياسى ماماندىعى بويىنشا ءبىلىم العان. الايدا ۋاقىت وتە كەلە ءوزىنىڭ قىزىعۋشىلىعى اقپاراتتىق تەحنولوگيالار مەن دەرەكتەردى تالداۋ سالاسىنا جاقىن ەكەنىن تۇسىنەدى. وسىلايشا ول جاڭا باعىتتى مەڭگەرۋگە شەشىم قابىلدايدى.
ءىت سالاسىنا بەت بۇرعان نۇرلى داتا-اناليتيكا نەگىزدەرىن ءتۇرلى ونلاين كۋرستار ارقىلى ۇيرەندى. وزدىگىنەن ءبىلىم الىپ، دەرەكتەردى وڭدەۋ، تالداۋ جانە ۆيزۋاليزاتسيالاۋ قۇرالدارىن مەڭگەرە باستايدى. قىسقا ۋاقىت ىشىندە بىرنەشە پراكتيكالىق جوبا جاساپ، كاسىبي پورتفوليوسىن قالىپتاستىرادى. بۇل ونىڭ تاجىريبەسىن كورسەتىپ قانا قويماي، حالىقارالىق كومپانيالاردىڭ نازارىن اۋدارۋعا مۇمكىندىك بەردى.
ناتيجەسىندە نۇرلى كۇزدىكباي الەمدەگى ەڭ ءىرى تەحنولوگيالىق كومپانيالاردىڭ ءبىرى سانالاتىن Amazon قۇرامىنا قوسىلىپ، داتا-اناليتيك رەتىندە جۇمىسقا ورنالاستى. بۇگىندە ول كومپانياداعى دەرەكتەردى تالداۋ، بيزنەس كورسەتكىشتەرىن زەرتتەۋ جانە شەشىم قابىلداۋعا كومەكتەسەتىن اناليتيكالىق ەسەپتەر دايىنداۋ باعىتىندا ەڭبەك ەتىپ كەلەدى.
