الماتى وبلىسىندا ەرەكشە قاجەتتىلىكتەرى بار كاسىپكەر ايدار مامانوۆ 5,5 مىڭ باسقا ارنالعان قۇس فەرماسىن اشۋدى جوسپارلاپ وتىر. نىساننىڭ قۇرىلىسى اعىمداعى جىلى اياقتالادى.
ايدار مامانوۆ 29 جاستا. الاكول اۋدانىنىڭ قىزىلقايىڭ اۋىلىندا دۇنيەگە كەلگەن. جوعارى وقۋ ورنىن ءبىتىرىپ، تالدىقورعاندا اسكەري قىزمەتتە بولدى. 2016 جىلى جازاتايىم وقيعا بولىپ، ايدار بەل ومىرتقاسىنىڭ جاراقات الدى. الايدا ول اۋىر سىناققا توتەپ بەرىپ، جىگەرلىنە ءتۇستى. وتباسىلىق كاسىپتى جالعاستىرىپ، ودان ارى كەڭەيتۋگە شەشىم قابىلدادى.
«جانۇيامىز بۇرىننان قۇس شارۋاشىلىعىمەن اينالىسىپ كەلەدى. ءۇي اۋلاسىندا تاۋىق، قاز جانە ۇيرەك ۇستاپ كەلگەنبىز. ۇيدە بوس وتىرماي، قولعابىس بولىپ، وتباسىلىق كاسىپتى دوڭگەلەتۋدى ويلادىم. اتا-اناممەن اقىلداستىم. شەشىمىمدى قولدادى. وسىلايشا «اتامەكەن» كاسىپكەرلەر پالاتاسىنا جۇگىنىپ، كاسىپكەرلىكتى قولداۋ شارالارى تۋرالى كەڭەس الدىم. ءىستىڭ قىر-سىرىن ۇيرەنۋ ءۇشىن «باستاۋ بيزنەس» جوباسىنا وقۋعا جازىلدىم»، - دەدى ول.
2019 جىلى ايدار مامانوۆ الاكول اۋدانىندا «ەڭبەك» مەملەكەتتىك باعدارلاماسى اياسىنداعى «باستاۋ بيزنەس» كاسىپكەرلىك نەگىزدەرىنە وقىتۋدان ءوتتى. وندا العاش رەت بيزنەس تۋرالى ءبىلىم الىپ، كاسىپتى جۇرگىزۋ مەن دامىتۋدىڭ قىر-سىرىن ۇيرەندى. قايسارلىق پەن ەڭبەك ءوز جەمىسىن بەردى. ايداردىڭ بيزنەس-جوباسى مەملەكەتتىك باعدارلامالار اياسىندا قارجىلاندىرۋعا قول جەتكىزدى.
«ءبىر جىل بۇرىن «دامۋ» قورى بويىنشا 1 ميلليون تەڭگە كولەمىندەگى گرانتقa, كەيىن «بيزنەستىڭ جول كارتاسى – 2025» باعدارلاماسى شەڭبەرىندە 2,5 ملن تەڭگە سوماسىندا قايتارىمسىز گرانتقا يە بولدىم. بۇل قاراجاتقا ينكۋباتور، شاعىن تراكتور، ۇساقتاعىش جانە باسقا دا قاجەتتى جابدىقتار ساتىپ الىندى. قازىر شامامەن اي سايىن 200-400 باس قۇس ساتامىز. بولاشاقتا قۇستاردىڭ سانى كوپ بولادى. سەبەبى قۇس فەرماسىن اشۋدى جوسپارلاپ وتىرمىز»، - دەپ اتاپ ءوتتى جاس كاسىپكەر.
