فوتو: sondakika.com
تۇركيانىڭ ىستامبۇل قالاسىندا 26 جاستاعى قازاقستاندىق ايسۇلۋ بەكماحانوۆانىڭ جۇمباق جاعدايدا كوز جۇمۋى جەرگىلىكتى ايەلدەردىڭ نارازىلىعىنا ۇلاستى. قىز-كەلىنشەكتەر وتانداسىمىز قۇلاعان كوشەگە جينالىپ، قايعىلى وقيعانىڭ ءادىل ءارى جان-جاقتى تەرگەلۋىن تالاپ ەتتى، دەپ حابارلايدى “ادىرنا” ۇلتتىق پورتالى KTK ارناسىنا سىلتەپ.
جينالعانداردىڭ پىكىرىنشە، ايسۇلۋدىڭ ءولىمىن ءوز-وزىنە قول جۇمساۋ دەپ قاراستىرۋعا بولمايدى. ولار وقيعانىڭ بارلىق ءمان-جايى انىقتالىپ، وعان قاتىسى بار ادامدار زاڭ الدىندا جاۋاپ بەرۋى كەرەگىن العا تارتتى. سونداي-اق ايەلدەر قۇقىعىنىڭ قورعالۋىنا نازار اۋداردى.
ەسكە سالساق، قايعىلى جاعداي وتكەن جەكسەنبىدە بولعان. الدىن الا مالىمەتتەرگە سايكەس، قازاقستاندىق قىز بالكون ارقىلى كورشى عيماراتتىڭ شاتىرىنا كوتەرىلگەن. ونىڭ بيىكتە وتىرعان ءساتى تۇسىرىلگەن سوڭعى فوتوسى دا الەۋمەتتىك جەلىلەردە تارادى. كەيىن كورشى ءۇيدىڭ توبەسىنە وتپەك بولعان كەزدە تومەنگە قۇلاپ كەتكەن بولۋى مۇمكىن. ايسۇلۋ العان جاراقاتىنان وقيعا ورنىندا كوز جۇمعان.
وسى وقيعادان كەيىن مارقۇممەن بىرگە تۇرعان رەسەي ازاماتى مەن ونىڭ سۇيىكتىسى ۇستالعان. الايدا تەرگەۋ اياسىندا جاۋاپ الىنعان سوڭ، ولار ەلدەن شىقپاۋ تۋرالى قولحاتپەن بوساتىلعان.
