بۇگىن، 21 شىلدە كۇنى اقتاۋ قالاسىندا جانە وعان جاقىن اۋدانداردا قالاىشىلىك جانە قالاارالىق باعىتتاردا قاتىنايتىن اۆتوبۋس جۇرگىزۋشىلەرى ەرەۋىلگە شىقتى، دەپ حابارلايدى «ادىرنا» ءتىلشىسى Lada.kz-كە سىلتەمە جاساپ.
ولار جالاقىلارىن كوتەرۋدى، ەڭبەك جاعدايىن جاقسارتۋدى جانە وزدەرىن الەۋمەتتىك پاكەتپەن قامتاماسىز ەتۋدى تالاپ ەتىپ وتىر.
كولىك جۇرگىزۋشىلەردىڭ 80%-دان استامى ەرەۋىلگە قوسىلدى. «Caspian Trans Corporation» مەن «كاسپي اۆتو پارك» كومپانيالارىنىڭ باسشىلىعىنا، سونداي-اق اكىمدىك، ەڭبەك ينسپەكتسياسى جانە پروكۋراتۋراعا بىرنەشە رەت جۇگىندىم. بىراق ەشقانداي جاۋاپ بولعان جوق»،—دەيدى اكتسياعا قاتىسۋشىلاردىڭ ءبىرى.
ەرەۋىلشىلەر جۇرگىزۋشىلەردىڭ جۇمىستى تۇنگە دەيىن اياقتاپ، تاڭعى تورتتە قايتا تۇرىپ، قايتا جۇمىسقا شىعاتىنىن مالىمدەدى. ايتۋلارىنشا، بۇل جاعداي جۇرگىزۋشىلەردىڭ قاتتى شارشاۋىنا جانە جول-كولىك وقيعالارىنىڭ جيىلەۋىنە سەبەپ بولىپ وتىر. ولار كەيدە رولدە وتىرىپ قالعىپ كەتەتىن جاعدايلار بولاتىنىن دا جەتكىزدى.
«ايلىق جالاقىنى الۋ ءۇشىن ەسەپشىگە جالىنۋعا تۋرا كەلەدى. اۋىرعان كۇندەر اقىسى تولەنبەيدى. جۇمىس جاعدايى جاسالماعان. دارەت الاتىن جەر دە جوق»،—دەيدى جۇرگىزۋشىلەردىڭ ءبىرى.
ماڭعىستاۋ وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ مالىمەتىنشە، اۆتوبۋس جۇرگىزۋشىلەرىنىڭ ەرەۋىلىنە بايلانىستى جاعدايدى انىقتاپ، شەشۋ ءۇشىن اكىمدىك تاراپىنان جەدەل جۇمىس توبى جاساقتالىپ، وقيعا ورنىنا بارعان.
جۇمىس توبى مەن جۇمىس بەرۋشى تاراپ جۇرگىزۋشىلەرگە قولدانىستاعى زاڭ اياسىندا ءتيىستى ءتۇسىندىرۋ جۇمىستارىن جۇرگىزىپ، كوتەرىلگەن ماسەلەلەردىڭ شەشۋ جولدارى قاراستىرىلاتىنىن مالىمدەگەن.
جۇرگىزىلگەن ەكىجاقتى كەلىسسوزدەر ناتيجەسىندە اۆتوبۋستار ساعات 11:00-دە قالىپتى كەستە بويىنشا قايتا جولعا شىققان.
