ۇلىبريتانيا حانزاداسى ۋيليام گرەم نورتوننىڭ تەلەشوۋىندا قازاقستانداعى كيىك پوپۋلياتسياسىنىڭ قالپىنا كەلتىرۋ تۋرالى ايتتى، دەپ حابارلايدى "ادىرنا" ۇلتتىق پورتالى.
ول سيرەك كەزدەسەتىن جانۋارلاردى ساقتاۋدا مەملەكەت قولداۋىنىڭ ماڭىزىن اتاپ ءوتتى.
ۆۆس-گە بەرگەن سۇحبات 23 قازاندا ەفيرگە شىققان. ونى قازاقستاننىڭ ۇلىبريتانياداعى ەلشىلىگى جاريالادى.
باعدارلاما بارىسىندا جۇرگىزۋشى كيىكتەردىڭ ەرەكشە كەلبەتى مەن «التىن دالا» تابيعاتتى قورعاۋ باستاماسى تۋرالى سۇراق قويعان. جاۋاپ بەرگەن حانزادا ءبىر كەزدەرى جويىلىپ كەتۋ قاۋپىنە ۇشىراعان جانۋارلاردىڭ سانى قايتا كوبەيگەنىن ايتتى. ونىڭ سوزىنشە، بۇل ناتيجەگە قازاقستان بيلىگىنىڭ كيىكتەردى ساقتاۋعا ەرەكشە كوڭىل ءبولۋىنىڭ ارقاسىندا قول جەتكىزىلگەن.
«كيىكتەر جويىلىپ كەتۋ قاۋپىنىڭ الدىندا تۇردى، ال قازىر ولاردىڭ سانى قايتادان وراسان زور. بۇل قازاقستان ۇكىمەتىنىڭ وسى ءتۇردىڭ ەل مەن تابيعات ءۇشىن ماڭىزىن ءتۇسىنىپ، جوباعا تولىق قولداۋ كورسەتۋىنىڭ ارقاسىندا مۇمكىن بولدى»، – دەدى حانزادا ۋيليام.
«التىن دالا» باستاماسى قازاقستاننىڭ دالالىق ەكوجۇيەلەرىن قالپىنا كەلتىرۋگە جانە بيوالۋانتۇرلىلىكتى ساقتاۋعا باعىتتالعان. 2024 جىلى جوبا Earthshot Prize سىيلىعىنىڭ «تابيعاتتى قورعاۋ جانە قالپىنا كەلتىرۋ» ساناتى بويىنشا جەڭىمپاز اتانىپ، جۇمىستى جالعاستىرۋ ءۇشىن 1 ميلليون فۋنت ستەرلينگ كولەمىندە قارجى العان.
Earthshot Prize ۇيىمىنىڭ 2025 جىلعى قازاندا جاريالاعان مالىمەتىنە سايكەس، جوبانىڭ ناتيجەسىندە جيىرما جىل ىشىندە كيىكتەردىڭ سانى شامامەن 40 مىڭنان 200 مىڭعا دەيىن وسكەن.
