ۇلىبريتانيانىڭ جاڭا پرەمەر-ءمينيسترى قىزمەتىنە كىرىسكەن ەندي بيورنەم 20 شىلدەدە جۋرناليستەرگە بەرگەن مالىمدەمەسىندە العاشقى تەلەفون قوڭىراۋلارىن ۋكراينا پرەزيدەنتى ۆلاديمير زەلەنسكيگە جانە اقش پرەزيدەنتى دونالد ترامپقا شالاتىنىن ايتتى. بۇل تۋرالى DW باسىلىمى جازدى، دەپ حابارلايدى "ادىرنا".
بريتان ساياساتكەرى زەلەنسكيگە لوندوننىڭ ۋكرايناعا كورسەتىپ وتىرعان كومەگىندە «ەشقانداي وزگەرىس بولمايتىنىن» جەتكىزەتىنىن جانە بۇرىنعى پرەمەر-مينيستر كير ستارمەر سياقتى ۋكراين كوشباسشىسىن «100 پايىز قولدايتىنىن» مالىمدەدى.
«پرەزيدەنت زەلەنسكي ۇلىبريتانيانىڭ قولداۋىنىڭ بەرىك ءارى مىزعىماس ەكەنىنە ەش كۇماندانبايدى. بۇل قولداۋ ءارى قاراي دا جالعاسادى، مەن دە جەكە ءوزىم ونىڭ جانىندا بولامىن»، – دەدى بيورنەم.
گەرمانيا كانتسلەرى فريدريح مەرتس جاڭا پرەمەر-ءمينيستردى قىزمەتكە كىرىسۋىمەن قۇتتىقتاپ، جاقىن ارادا گەرمانياعا كەلۋگە شاقىردى.
مەرتستىڭ ايتۋىنشا، ول بيورنەممەن قازىرگى حالىقارالىق سىن-قاتەرلەردى تالقىلاۋعا مۇددەلى. كانتسلەر ۇلىبريتانيا مەن گەرمانيانىڭ جاقىن وداقتاس ءارى سەرىكتەس مەملەكەتتەر ەكەنىن اتاپ ءوتتى.
ء«دال وسىنداي كەزەڭدەردە ءبىزدىڭ تەرەڭ بايلانىسىمىز ايقىن كورىنەدى»، – دەدى مەرتس.
ەۋروپالىق كەڭەستىڭ توراعاسى انتونيۋ كوشتا دا بريۋسسەل مەن لوندون اراسىنداعى قارىم-قاتىناستى نىعايتۋ جۇمىستارى جالعاسادى دەگەن ءۇمىت ءبىلدىردى.
ونىڭ ايتۋىنشا، سوڭعى ەكى جىلدا ەۋرووداق پەن ۇلىبريتانيا اراسىنداعى بايلانىس جاڭا ءارى وڭ سەرپىن العان.
ء«بىزدىڭ ازاماتتارىمىز بەن بيزنەس ءۇشىن ىنتىماقتاستىقتى ودان ءارى تەرەڭدەتۋدى اسىعا كۇتەمىن. ۇلىبريتانيا مەن ەۋرووداق بىرگە بولعاندا الدەقايدا مىقتى»، – دەپ جازدى كوشتا X الەۋمەتتىك جەلىسىندە.
بۇرىن مانچەستەر قالاسىنىڭ مەرى بولعان ەندي بيورنەم سوڭعى ون جىل ىشىندە ۇلىبريتانيانىڭ جەتىنشى پرەمەر-ءمينيسترى اتاندى. ال رەسەيدىڭ ۋكرايناعا قارسى سوعىسى باستالعالى بەرى بۇل قىزمەتكە كەلگەن بەسىنشى پرەمەر بولىپ وتىر.
17 شىلدەدە بيورنەم رەسمي تۇردە لەيبوريستىك پارتيانىڭ جاڭا كوشباسشىسى بولىپ جاريالاندى.
ساياساتكەر پارتيانىڭ قالىپتى سولشىل قاناتىنىڭ باستى ءۇمىتى سانالادى جانە ۇلتتىق ءارى وڭىرلىك دەڭگەيدە مول ساياسي تاجىريبەگە يە. ول العاش رەت 2001 جىلى قاۋىمدار پالاتاسىنا سايلانعان. كەيىن توني بلەر مەن گوردون براۋن ۇكىمەتتەرىندە بىرقاتار جوعارى لاۋازىمداردى اتقاردى. اتاپ ايتقاندا، قازىناشىلىقتىڭ باس حاتشىسى، مادەنيەت ءمينيسترى جانە دەنساۋلىق ساقتاۋ ءمينيسترى قىزمەتتەرىن اتقارعان.
بۋكينگەم سارايى كورول III كارل مەن جاڭا پرەمەر-ءمينيستردىڭ قول الىسىپ تۇرعان فوتوسۋرەتىن جاريالادى.
بيورنەم لەيبوريستىك پارتيا كوشباسشىلىعىنا جالعىز ۇمىتكەر بولدى. ونى قاۋىمدار پالاتاسىنداعى 403 لەيبوريست دەپۋتاتتىڭ 379-ى قولدادى.
ەكس-مەر حالىقتىڭ ءومىر ءسۇرۋ دەڭگەيىن جاقسارتۋعا ۋادە بەرىپ وتىر. ساراپشىلاردىڭ پىكىرىنشە، جاقىن ۋاقىتتا ول مينيسترلەر كابينەتىندە كادرلىق وزگەرىستەر جاساۋى مۇمكىن.
مانچەستەردى توعىز جىل باسقارعان كەزەڭدە بيورنەم «سولتۇستىكتىڭ كورولى» دەگەن بەيرەسمي لاقاپ اتقا يە بولدى. ونىڭ باسشىلىعىمەن ءوڭىر ەكونوميكاسى ەلدەگى ورتاشا كورسەتكىشتەن جىلدام ءوسىپ، قالالىق اۋداندارداعى كەدەيلىك دەڭگەيى تومەندەگەن.
لەيبوريستىك پارتيا بيورنەم وڭشىل پوپۋليست ساياساتكەر نايدجەل فارادجدىڭ جانە ونىڭ Reform UK پارتياسىنىڭ تانىمالدىعىنىڭ ارتۋىن تەجەۋگە ىقپال ەتەدى دەپ ۇمىتتەنەدى.
بۇعان دەيىن The Times گازەتىنە جاريالانعان ماقالاسىندا بيورنەم ۇلىبريتانيانىڭ الەمدىك ارەناداعى جەتەكشى ءرولىن ساقتاۋعا جانە قازىرگى وداقتاستىقتاردى نىعايتۋعا بەيىلدى ەكەنىن ايتقان.
ال بۇرىنعى پرەمەر-مينيستر كير ستارمەر قىزمەتكە كەلگەننەن كەيىن ەكى جىل وتكەن سوڭ ساياسي ساتسىزدىكتەر مەن پارتياىشىلىك قىسىمنىڭ كۇشەيۋىنە بايلانىستى 22 ماۋسىمدا وتستاۆكاعا كەتەتىنىن مالىمدەگەن بولاتىن.
