Ұлыбританияның жаңа премьер-министрі қызметіне кіріскен Энди Бёрнем 20 шілдеде журналистерге берген мәлімдемесінде алғашқы телефон қоңырауларын Украина президенті Владимир Зеленскийге және АҚШ президенті Дональд Трампқа шалатынын айтты. Бұл туралы DW басылымы жазды, деп хабарлайды "Адырна".
Британ саясаткері Зеленскийге Лондонның Украинаға көрсетіп отырған көмегінде «ешқандай өзгеріс болмайтынын» жеткізетінін және бұрынғы премьер-министр Кир Стармер сияқты украин көшбасшысын «100 пайыз қолдайтынын» мәлімдеді.
«Президент Зеленский Ұлыбританияның қолдауының берік әрі мызғымас екеніне еш күмәнданбайды. Бұл қолдау әрі қарай да жалғасады, мен де жеке өзім оның жанында боламын», – деді Бёрнем.
Германия канцлері Фридрих Мерц жаңа премьер-министрді қызметке кірісуімен құттықтап, жақын арада Германияға келуге шақырды.
Мерцтің айтуынша, ол Бёрнеммен қазіргі халықаралық сын-қатерлерді талқылауға мүдделі. Канцлер Ұлыбритания мен Германияның жақын одақтас әрі серіктес мемлекеттер екенін атап өтті.
«Дәл осындай кезеңдерде біздің терең байланысымыз айқын көрінеді», – деді Мерц.
Еуропалық кеңестің төрағасы Антониу Кошта да Брюссель мен Лондон арасындағы қарым-қатынасты нығайту жұмыстары жалғасады деген үміт білдірді.
Оның айтуынша, соңғы екі жылда Еуроодақ пен Ұлыбритания арасындағы байланыс жаңа әрі оң серпін алған.
«Біздің азаматтарымыз бен бизнес үшін ынтымақтастықты одан әрі тереңдетуді асыға күтемін. Ұлыбритания мен Еуроодақ бірге болғанда әлдеқайда мықты», – деп жазды Кошта X әлеуметтік желісінде.
Бұрын Манчестер қаласының мэрі болған Энди Бёрнем соңғы он жыл ішінде Ұлыбританияның жетінші премьер-министрі атанды. Ал Ресейдің Украинаға қарсы соғысы басталғалы бері бұл қызметке келген бесінші премьер болып отыр.
17 шілдеде Бёрнем ресми түрде Лейбористік партияның жаңа көшбасшысы болып жарияланды.
Саясаткер партияның қалыпты солшыл қанатының басты үміті саналады және ұлттық әрі өңірлік деңгейде мол саяси тәжірибеге ие. Ол алғаш рет 2001 жылы Қауымдар палатасына сайланған. Кейін Тони Блэр мен Гордон Браун үкіметтерінде бірқатар жоғары лауазымдарды атқарды. Атап айтқанда, Қазынашылықтың бас хатшысы, мәдениет министрі және денсаулық сақтау министрі қызметтерін атқарған.
Букингем сарайы король III Карл мен жаңа премьер-министрдің қол алысып тұрған фотосуретін жариялады.
Бёрнем Лейбористік партия көшбасшылығына жалғыз үміткер болды. Оны Қауымдар палатасындағы 403 лейборист депутаттың 379-ы қолдады.
Экс-мэр халықтың өмір сүру деңгейін жақсартуға уәде беріп отыр. Сарапшылардың пікірінше, жақын уақытта ол министрлер кабинетінде кадрлық өзгерістер жасауы мүмкін.
Манчестерді тоғыз жыл басқарған кезеңде Бёрнем «Солтүстіктің королі» деген бейресми лақап атқа ие болды. Оның басшылығымен өңір экономикасы елдегі орташа көрсеткіштен жылдам өсіп, қалалық аудандардағы кедейлік деңгейі төмендеген.
Лейбористік партия Бёрнем оңшыл популист саясаткер Найджел Фарадждың және оның Reform UK партиясының танымалдығының артуын тежеуге ықпал етеді деп үміттенеді.
Бұған дейін The Times газетіне жарияланған мақаласында Бёрнем Ұлыбританияның әлемдік аренадағы жетекші рөлін сақтауға және қазіргі одақтастықтарды нығайтуға бейілді екенін айтқан.
Ал бұрынғы премьер-министр Кир Стармер қызметке келгеннен кейін екі жыл өткен соң саяси сәтсіздіктер мен партияішілік қысымның күшеюіне байланысты 22 маусымда отставкаға кететінін мәлімдеген болатын.
