بۇگىن - قازاقستان رەسپۋبليكاسىنىڭ كورنەكتى ساياسي جانە مەملەكەت قايراتكەرى نۇرلان وتەپۇلى بالعىمباەۆتىڭ تۋعان كۇنى. ءتىرى بولعاندا 75 جاسقا تولار ەدى، دەپ حابارلايدى “ادىرنا” ۇلتتىق پورتالى
نۇرلان بالعىمباەۆ – مۇنايشىلار ديناستياسىنان شىققان: اكەسى مەن نەمەرە اعالارى مۇنايشى بولعان.
كەزىندە ءوزى عانا ەمەس، وزگەلەر دە «ناعىز شارۋانىڭ ادامى» اتاعان ول پرەمەر-مينيستر بولىپ 1997 جىلى تاعايىندالدى. تەحنوكرات بالعىمباەۆ بۇل قىزمەتكە پرەزيدەنت بولعىسى كەلەتىنىن مالىمدەي باستاعان اكەجان قاجىگەلديننىڭ ورنىنا كەلدى. پرەمەر قىزمەتىندە بالعىمباەۆ ەكى جىل وتىردى. بۇل - تەڭگەنىڭ دوللارعا شاققانداعى باعامى ەكى ەسە قۇلدىراپ، ەلدى قارجى جانە ەكونوميكالىق داعدارىس جايلاعان جىلدار بولاتىن.
نۇرلان بالعىمباەۆ پرەمەر-مينيستر قىزمەتىنەن كەتكەننەن كەيىن پرەزيدەنت نازارباەۆتىڭ «تاساداعى» ادامدارى قاتارىنا ىسىرىلعانىمەن، حالىق ايتقانداي «دالادا قالعان جوق». مۇناي ءوندىرۋ سالاسىندا ءتۇرلى قىزمەتتەر اتقارىپ، از ۋاقىت پرەزيدەنت نازارباەۆتىڭ كەڭەسشىسى بولدى. قايتىس بولارىنان ءسال بۇرىن Forbes.kz سايتى قازاقستاننىڭ ەڭ ىقپالدى 50 بيزنەسمەننىڭ ىشىندە نۇرلان بالعىمباەۆقا 23-ورىن بەرگەن.
Forbes.kz سايتىنىڭ مالىمەتىنشە، «بالالارى تولەگەن جانە سامال بالعىمباەۆتارمەن بىرگە «قازاقستان مۇناي ينۆەستيتسيا كومپانياسىنىڭ» قۇرىلتايشىسى. مۇناي-گاز سالاسىندا قۇرىلىس جانە ينجەنەرلىك قىزمەت كورسەتۋمەن اينالىساتىن «Isker» كونتسورتسيۋمىنىڭ بالاسى ارقىلى ۇلەستەسى. قىزى - «Aتىراۋ دەۆەلوپمەنت»، «كەپيتال پروپەرتيس»، Renaissance Aktau Hotel, Renaissance Atyrau Hotel» سياقتى كومپانيالاردىڭ سەرجان جۇماشەۆپەن بىرگە تەڭ قوجايىنى. بالعىمباەۆ – «قازمۇنايگاز» كومپانياسى سالاتىن كاسىپورىندار ديرەكتسياسىنىڭ باس ديرەكتورى» دەلىنگەن.
مەملەكەت قايراتكەرى، دارابوز مۇنايشى نۇرلان بالعىمباەۆ 2015 جىلى 68 جاسقا قاراعان شاعىندا ومىردەن وزدى.
