بۇگىن، 10 ماۋسىمدا تۋريزم جانە سپورت مينيسترلىگى شاحماتشى ءبيبىسارا اساۋباەۆانىڭ دايىندىعىنا 210 ميلليون تەڭگە بولىنگەنىن مالىمدەدى، دەپ حابارلايدى «ادىرنا» ءتىلشىسى.
ۆيتسە-مينيستر سەرىك جاراسباەۆتىڭ سوزىنشە، بۇل قاراجاتقا سپورت پەن ءتۋريزمدى قولداۋ قورىنىڭ، قازاقستان شاحمات فەدەراتسياسىنىڭ جانە باسقا دا ۇيىمداردىڭ قارجىسى كىرەدى.
«مينيسترلىك بولگەن قاراجاتتان بولەك، شاحمات فەدەراتسياسى دا بيۋدجەتتەن تىس قارجى بولەدى. فەدەراتسيامەن جانە ءتۇرلى ۆەدومستۆولىق ۇيىمدارمەن بىرلەسىپ، 2026 جىلى ءبيبىسارا اساۋباەۆانىڭ دايىندىعىنا جالپى العاندا شامامەن 210 ميلليون تەڭگە قاراستىردىق. بىلتىر بۇل كورسەتكىش شامامەن 160 ميلليون تەڭگە بولعان»، – دەدى ول ارنايى ۇيىمداستىرىلعان بريفينگتە.
جاراسباەۆ 2023–2024 جىلدارى سپورتشىنىڭ سپورتتى دامىتۋ ديرەكتسياسى ارقىلى ايىنا شامامەن 1 ميلليون تەڭگە جالاقى الىپ كەلگەنىن مالىمدەدى. الايدا 2025 جىلى باسىم سپورت تۇرلەرىنىڭ ءتىزىمىن ايقىندايتىن جاڭا زاڭ كۇشىنە ەنىپ، شاحمات بۇل تىزىمگە كىرمەگەن. سەبەبى ول وليمپيادالىق سپورت تۇرىنە ەمەس، كەشەندى سپورتتىق ءىس-شارالارعا جاتقىزىلعان. ۆيتسە-ءمينيستردىڭ ايتۋىنشا، وسىعان بايلانىستى سپورتشىنىڭ كەلىسىمشارت بويىنشا جالاقىسى قىسقارتىلعان، ويتكەنى بۇرىنعىداي وليمپياداشىلاردىڭ دەڭگەيىندە قارجىلاندىرۋ مۇمكىن بولماعان.
مينيسترلىك وكىلى سپورتشىنىڭ Sport Qory قورىنا قاتىستى سىنىنا دا جاۋاپ بەردى. سەرىك جاراسباەۆتىڭ ايتۋىنشا، ءبيبىسارا اساۋباەۆانىڭ ءوتىنىمى ماقۇلدانىپ، حالىقارالىق جارىستارعا دايىندالۋى ءۇشىن قور ارقىلى 100 ميلليون تەڭگە بولىنگەن.
ۆيتسە-ءمينيستردىڭ پىكىرىنشە، شاحماتشى قارجىلاندىرۋعا قاتىستى ەكىنشى ءوتىنىمدى مەڭزەگەن بولۋى مۇمكىن. الايدا قور بيۋدجەتىنىڭ شەكتەۋلى بولۋىنا بايلانىستى بۇل ءوتىنىم قولداۋ تاپپاعان.
«سپورت پەن ءتۋريزمدى قولداۋ قورى بولىنگەن 100 ميلليون تەڭگەمەن شەكتەلدى. بىراق قارجىلاندىرۋ كولەمىنىڭ جىل سايىنعى وسىمىنە نازار اۋدارساق، 2024 جىلى وعان 63 ميلليون تەڭگە، 2025 جىلى 79 ميلليون تەڭگە، ال 2026 جىلى 100 ميلليون تەڭگە ءبولىندى. مەنىڭ ويىمشا، ءبىر سپورتشىنىڭ ساپالى دايىندالىپ، جوعارى حالىقارالىق دەڭگەيدە ونەر كورسەتۋى ءۇشىن بۇل قاراجات جەتكىلىكتى بولۋى ءتيىس»، – دەدى سەرىك جاراسباەۆ.
سونداي-اق ۆەدومستۆو II دارەجەلى «بارىس» وردەنىنە قاتىستى جاعدايعا دا تۇسىنىكتەمە بەردى. مينيسترلىكتىڭ حابارلاۋىنشا، ماراپاتتاۋ تۋرالى جارلىققا پرەزيدەنت قول قويعان، الايدا سپورتشىنىڭ تىعىز جۇمىس كەستەسىنە بايلانىستى وردەندى تاپسىرۋ ءراسىمى ءالى وتكىزىلمەگەن.
ء«بيبىسارانى 8 ناۋرىز مەرەكەسىنە وراي اقوردادا وتەتىن قۇرمەت كورسەتۋ شاراسىنا شاقىرۋ تۋرالى ۇسىنىستار بولعان. ءبىز تىزىمگە ەنگىزدىك، بىراق ول سول كەزدە كيپردە جارىسقا دايىندالىپ جاتقاندىقتان قاتىسا المادى. قازاقستانعا ورالىپ، كەستەسى رەتتەلگەننەن كەيىن ماراپات ءوز يەسىنە تابىستالادى دەپ ويلايمىن»، – دەدى سەرىك جاراسباەۆ.
ەسكە سالايىق، بۇعان دەيىن گروسسمەيستەر ءبيبىسارا اساۋباەۆا پرەزيدەنت قاسىم-جومارت توقاەۆقا بەينەۇندەۋ جولداپ، سپورت مينيسترلىگى جالاقىسىن ءۇش ەسە قىسقارتقانىن ايتقان بولاتىن. سونداي-اق ول 2025 جىلدىڭ جەلتوقسانىندا مەملەكەت باسشىسى وزىنە II دارەجەلى «بارىس» وردەنىن تابىستاۋ تۋرالى شەشىم قابىلداعانىمەن، ماراپاتتى ءالى الماعانىن مالىمدەگەن ەدى.
