شىمكەنت قالاسى بويىنشا ۇلتتىق قاۋىپسىزدىك كوميتەتى دەپارتامەنتى باسشىسىنىڭ بۇرىنعى ءبىرىنشى ورىنباسارى مانات سارباسوۆقا قاتىستى قىلمىستىق ءىس قايتا قارالادى، دەپ حابارلايدى "ادىرنا" ۇلتتىق پورتالى.
كاسساتسيالىق سوت وعان تاعايىندالعان 12 جىلدىق باس بوستاندىعىنان ايىرۋ جازاسى تۋرالى ۇكىمنىڭ كۇشىن جويدى.
2025 جىلعى قازاندا القابيلەر مانات سارباسوۆتى پارا الۋ، اقشانى زاڭداستىرۋ جانە قىزمەتتىك مىندەتتەرىن ورىنداماۋ بويىنشا كىنالى دەپ تانىعان. سوت ونى 12 جىلعا باس بوستاندىعىنان ايىرعان. سونىمەن قاتار ول الاياقتىق جانە وزگە دە بىرقاتار ايىپ بويىنشا اقتالعان.
تەرگەۋ نۇسقاسىنا سايكەس، سارباسوۆ كاسىپكەردەن جەكەمەنشىك مەكتەپكە قامقورلىق كورسەتۋ ءۇشىن 70 ميلليون تەڭگە العان. سونداي-اق ول بۇل قاراجاتتى جىلجىمايتىن مۇلىك ساتىپ الۋعا جۇمساپ، كەيىن ودان تۇسكەن تابىس ارقىلى اقشانى زاڭداستىردى دەپ ايىپتالعان.
بۇدان بولەك، وعان مەديتسينالىق جابدىق ساتىپ الۋ كەزىندە 92 ميلليون تەڭگەدەن استام قاراجاتتىڭ جىمقىرىلۋىنا بايلانىستى قىزمەتتىك ارەكەتسىزدىك جاسادى دەگەن ايىپ تاعىلعان. اتالعان ءىس بويىنشا باسقا دا بۇرىنعى شەنەۋنىكتەر مەن كاسىپكەرلەر جاۋاپقا تارتىلعان.
سارباسوۆتىڭ ادۆوكاتى جاسۇلان اسىلبەكوۆتىڭ ايتۋىنشا، قورعاۋ تاراپى القابيلەرگە قويىلعان سۇراقتاردىڭ كۇردەلى ءارى زاڭ تەرميندەرىنە تولى بولعانىن العا تارتقان. ونىڭ پىكىرىنشە، سۇراقتاردىڭ تۇجىرىمدارى تۇسىنىكسىز بولعان.
كاسساتسيالىق سوت وسى ماسەلەلەر بويىنشا زاڭبۇزۋشىلىقتار بولعانىن مويىنداپ، 12 جىلدىق جازا تاعايىندالعان ۇكىمنىڭ كۇشىن جويدى. ەندى قىلمىستىق ءىس قايتا قارالادى.
مانات سارباسوۆ شىمكەنت قالاسى بويىنشا ۇقك دەپارتامەنتى باسشىسىنىڭ بۇرىنعى ءبىرىنشى ورىنباسارى بولعان. ول ۇلتتىق قاۋىپسىزدىك ورگاندارىندا 20 جىلعا جۋىق قىزمەت اتقارعان.
