جامبىل وبلىسىندا مەملەكەتتىك ورگاننىڭ جۇمىسىنا قاتىستى Facebook الەۋمەتتىك جەلىسىندە جاريالانعان جازبا سوت تالقىلاۋىنا ۇلاستى، دەپ حابارلايدى “ادىرنا”.
ءبولىم باسشىسى جازبا اۆتورىنان اقپاراتتى تەرىسكە شىعارۋدى جانە مورالدىق زيان ءۇشىن وتەماقى تولەۋدى تالاپ ەتكەن. الايدا تاراپتار مەدياتسيا تارتىبىمەن كەلىسىمگە كەلدى.
تالاپ قويۋشىنىڭ ايتۋىنشا، جاريالانىم اۆتورى مەملەكەتتىك قىزمەت كورسەتۋ ساپاسىنا كۇمان كەلتىرىپ، ءبولىم جۇمىسىن «جەكە دۇكەنمەن» سالىستىرعان. سونداي-اق جازبادا مەكەمە قىزمەتكەرلەرى ازاماتتاردىڭ ماسەلەسىن شەشۋگە زاڭسىز كەدەرگى كەلتىرىپ وتىرعانداي اسەر قالىپتاسقان.
سوتتا جاريالانىم شىققان كەزدە مەملەكەتتىك قىزمەت كورسەتۋگە زاڭمەن بەلگىلەنگەن مەرزىمنىڭ ءالى اياقتالماعانى اتاپ ءوتىلدى. سوعان قاراماستان، الەۋمەتتىك جەلىدە قىزمەت كورسەتۋ مەرزىمىنىڭ بۇزىلعانى جانە ازاماتتارعا نەگىزسىز كەدەرگىلەر جاسالعانى تۋرالى مالىمدەمەلەر جاريالانعان.
تالاپ قويۋشى بۇل مالىمەتتەر شىندىققا سايكەس كەلمەيدى ءارى مەملەكەتتىك ورگاننىڭ بەدەلىنە نۇقسان كەلتىرۋى مۇمكىن دەپ ەسەپتەگەن. وسىعان بايلانىستى ول اقپاراتتى جالعان دەپ تانۋدى، جاريالانىمداردى ءوشىرۋدى، تەرىسكە شىعارۋ جاريالاۋدى جانە مورالدىق زيان ءۇشىن وتەماقى تولەۋدى تالاپ ەتكەن.
ءىستى قاراۋ بارىسىندا تاراپتار ءوزارا كەلىسىمگە كەلدى. مەدياتسيالىق كەلىسىم بويىنشا جاۋاپكەر Facebook جەلىسىندە تەرىسكە شىعارۋ جاريالاۋعا، بولىمنەن كەشىرىم سۇراۋعا جانە الداعى ۋاقىتتا اقپاراتتى جاريالاماس بۇرىن ونىڭ دۇرىستىعىن تەكسەرۋگە مىندەتتەلدى.
ءوز كەزەگىندە تالاپ قويۋشى باستاپقى تالاپتارىنان باس تارتتى. سوت مەدياتسيالىق كەلىسىمدى بەكىتىپ، ءىس بويىنشا ءىس جۇرگىزۋدى توقتاتتى. سوت ۇيعارىمى زاڭدى كۇشىنە ەندى.
