Plug and Play كومپانياسىمەن سەرىكتەستىك ورناتۋ بانككە الەم بويىنشا 100 مىڭ ستارتاپتى بىرىكتىرەتىن جاھاندىق ەكوجۇيەگە قول جەتكىزۋگە مۇمكىندىك بەرەدى. ولاردىڭ تەحنولوگيالارى بانك قىزمەتتەرىن دامىتۋعا، الاياقتىقپەن كۇرەسۋگە جانە سۋپەراپپتىڭ مۇمكىندىكتەرىن كەڭەيتۋگە كومەكتەسەدى.
قازاقستانداعى ەڭ ءىرى بانك Halyk Bank پەن Plug and Play كومپانياسى الماتى قالاسىندا جاساندى ينتەللەكت سالاسىنداعى بىرلەسكەن قۇزىرەت ورتالىعىن قۇرۋ تۋرالى كەلىسىمگە كەلدى. بۇل باستاما بانككە دە، كرەمني القابىندا ورنالاسقان كومپانيانىڭ جاھاندىق جەلىسىنە كىرەتىن ستارتاپتارعا دا جاڭا مۇمكىندىكتەر اشادى.
«بۇل سەرىكتەستىك بىزگە الەمنىڭ تۇكپىر-تۇكپىرىندەگى ستارتاپتاردىڭ وزىق تەحنولوگيالىق شەشىمدەرىن قازاقستانعا جۇيەلى تۇردە تارتۋعا جانە Plug and Play كومپانياسىمەن بىرگە Halyk توبىنىڭ باسىم دامۋ باعىتتارى بويىنشا ۇزاق مەرزىمدى شەشىمدەر ازىرلەۋگە مۇمكىندىك بەرەدى. ءبىز جەكەلەگەن پيلوتتىق جوبالارمەن عانا شەكتەلمەيمىز»، – دەدى Halyk باسقارما توراعاسىنىڭ ورىنباسارى مۇرات كوشەنوۆ ىنتىماقتاستىققا قاتىستى پىكىر ءبىلدىرىپ.
Plug and Play كومپانياسىنىڭ نەگىزىن قالاۋشى ءارى باسشىسى سايد ءاميديدىڭ ايتۋىنشا، كومپانيانىڭ تاجىريبەسى ءىرى قارجى ينستيتۋتتارىندا قۇزىرەت ورتالىقتارىن قۇرۋ يننوۆاتسيالاردى ەنگىزۋگە تىڭ مۇمكىندىك بەرەتىنىن كورسەتەدى.
«ستارتاپتار ءوز شەشىمدەرىن ءىرى قارجى ينستيتۋتىنا، ونىڭ جەكە جانە بيزنەس-كليەنتتەرىنە ۇسىنۋعا مۇمكىندىك الادى. ال بانك ءوز سالاسىنىڭ الداعى ونجىلدىقتاعى دامۋىن ايقىندايتىن تەحنولوگيالاردى العاشقىلاردىڭ ءبىرى بولىپ باعالاي الادى»، – دەپ اتاپ ءوتتى سايد اميدي.
ىنتىماقتاستىق ارقاسىندا جاساندى ينتەللەكت سالاسىنداعى قۇزىرەت ورتالىعى قۇرىلادى.
Plug and Play كومپانياسىنىڭ ارنايى توبى Halyk بانكىنىڭ ىشىندە جۇمىس ىستەپ، ستارتاپتاردى ىزدەۋ جانە باعالاۋ، سونداي-اق بانكتىڭ باسىم مىندەتتەرىن شەشۋگە ارنالعان پيلوتتىق جوبالاردى ىسكە قوسۋمەن اينالىسادى.
جاساندى ينتەللەكت سالاسىنداعى بىرلەسكەن قۇزىرەت ورتالىعىن قۇرۋ Halyk پەن Plug and Play اراسىنداعى سەرىكتەستىكتىڭ كەلەسى كەزەڭى بولدى. بيىل مامىر ايىنىڭ باسىندا كومپانيالار ستارتاپتار ەكوجۇيەسىن دامىتۋعا، تاجىريبە الماسۋعا جانە ورتالىق ازياداعى تەحنولوگيالىق جوبالاردىڭ مۇمكىندىكتەرىن كەڭەيتۋگە باعىتتالعان ىنتىماقتاستىق تۋرالى مەموراندۋمعا قول قويعان.
