«Jambyl» تەلەارناسى ەلىمىزدە العاشقىلاردىڭ ءبىرى بولىپ جاساندى ينتەلەكت (جي) ارقىلى قازاق ەرتەگىلەرىنەن مۋلتفيلمدەر توپتاماسىن ازىرلەدى.
بۇگىن شىعارماشىلىق ۇجىم جەرگىلىكتى اكىمدىكپەن، ءبىلىم باسقارماسىمەن بىرلەسىپ مەكتەپ وقۋشىلارىنا جابىق كورسەتىلىم جاسادى. شاراعا وبلىس اكىمىنىڭ ءبىرىنشى ورىنباسارى نۇرجان كالەندەروۆ، ارداگەرلەر مەن باق وكىلدەرى، مەكەمە باسشىلارى، تەلەارنا ۇجىمى مەن مەكتەپ وقۋشىلارى قاتىستى.
جي ارقىلى جاسالعان مۋلتفيلمدەردىڭ جالپى سانى – 12, ۇزاقتىعى – 20 مينۋت.
توپتاماعا «قارلىعاش پەن ءداۋىت»، «اقىلدى شىبىن مەن جالقاۋ ايۋ»، «تۇلكى مەن تىرنا» سياقتى تانىمال قازاق ەرتەگىلەرى ەنگىزىلگەن.
– مەملەكەت باسشىسى قاسىم-جومارت توقاەۆ بيىلعى قازاقستان حالقىنا ارناعان جولداۋىندا تسيفرلاندىرۋ مەن جاساندى ينتەللەكتىنى بارلىق سالاعا ەنگىزۋدىڭ ماڭىزدىلىعىن اتاپ وتكەن بولاتىن. بۇل باعىتتا وڭىردە بىرقاتار جوبالار جۇزەگە اسىرىلىپ جاتىر. بۇگىنگى كورسەتىلىم دە سونىڭ دالەلى. ال ەرتەگىنى انيماتسيالاۋ تۋرالى يدەيا ايماقتا ىسكە اسىرىلىپ جاتقان "اجەمنىڭ ەرتەگىلەرى" جوباسىنان تۋىنداعان. ايتا كەتۋ كەرەك، ەلىمىزدە العاش رەت جي كومەگىمەن دايىندالعان بۇل تۋىندىلاردىڭ كورەرمەنگە جول تارتۋىنا وبلىس اكىمدىگى مەن ءبىلىم باسقارماسى قولداۋ كورسەتتى. ال ولاردىڭ دىبىستالۋىنا كورپوراتسيا قۇرامىنداعى «بالاپان» تەلەارناسى مەن ايماقتاعى ارداگەرلەر اتسالىستى. ال جوبانىڭ ديزاينەرى جاراس سەيسەباەۆ دەگەن ازامات،– دەدى تەلەارنا ديرەكتورى گۇلبارشىن قۇلانباەۆا.
دوستىققا، ەڭبەكقورلىققا، تۋعان جەردىڭ تاريحىن ناسيحاتتاۋعا باعىتتالعان مۋلتفيلمدەر توپتاماسى تەك تەلەارنا ەفيرىندە عانا ەمەس، سونداي-اق «اجەمنىڭ اڭگىمەسى» وڭىرلىك جوباسى اياسىندا بالاباقشا تاربيەلەنۋشىلەرىنە دە ۇسىنىلماق.
جاڭا مۋلتفيلمدەر وقۋشىلارعا ەرەكشە اسەر سىيلاپ، تانىمدىق كوكجيەگىن كەڭەيتتى.
ۇقساس جاڭالىقتار
