جامبىل وبلىستىق پوليتسيا دەپارتامەنتىنىڭ باستىعى باقىتجان مالىباەۆ ءوز ءوتىنىشى بويىنشا قىزمەتىنەن بوساتىلدى، دەپ حابارلايدى "ادىرنا" ۇلتتىق پورتالى ءىىم ءباسپاسوز قىزمەتىنە سىلتەمە جاساپ.
ۆەدومستۆو مالىمەتىنشە، مالىباەۆ راپورت جازىپ، ىشكى ىستەر ءمينيسترىنىڭ بۇيرىعىمەن اتقارىپ وتىرعان لاۋازىمىنان بوساتىلعان.
باقىتجان مالىباەۆ 2024 جىلدىڭ قىركۇيەگىندە جامبىل وبلىسى پد باستىعى بولىپ تاعايىندالعان ەدى. ول 1969 جىلى 23 شىلدەدە جامبىل وبلىسى قورداي اۋدانى قىزىلتاس اۋىلىندا دۇنيەگە كەلگەن. 1990 جىلدان باستاپ ىشكى ىستەر ورگاندارىندا ءتۇرلى باسشىلىق قىزمەتتەر اتقارعان.
ول 2016 جىلدان باستاپ استانا قالاسى ءىىد جەرگىلىكتى پوليتسيا قىزمەتىنىڭ باستىعى بولدى. 2018–2019 جىلدارى نۇر-سۇلتان قالاسى پوليتسيا دەپارتامەنتى باستىعىنىڭ ورىنباسارى بولىپ ەڭبەك ەتكەن. ال 2019 جىلدان باستاپ استانا قالاسى پد باستىعىنىڭ ءبىرىنشى ورىنباسارى قىزمەتىن اتقارعان.
2022 جىلدىڭ قاراشاسىنان 2024 جىلدىڭ قىركۇيەگىنە دەيىن كولىكتەگى پوليتسيا دەپارتامەنتىن باسقاردى.
ايتا كەتەيىك، تامىز ايىنىڭ سوڭىندا جامبىل وبلىسى پد باستىعىنىڭ بۇرىنعى ورىنباسارى ۇستالىپ، ۋاقىتشا ۇستاۋ يزولياتورىنا قامالعان ەدى. ونىڭ قانداي ىسكە بايلانىستى كۇدىككە ىلىنگەنى ءالى جاريالانعان جوق.
