2026 جىلعى 17 تامىزدا «تازا قازاقستان» جالپىۇلتتىق ەكولوگيالىق اكتسياسى اياسىندا تاراز قالاسىنداعى «ۇلى دالا» ىقشام اۋدانىندا «تازا مەكەن – تازا بولاشاق» تاقىرىبىندا ەكولوگيالىق اكتسيا ۇيىمداستىرىلدى.
«ۇلى دالا» ىقشام اۋدانى – ەلىمىزدەگى ەڭ ءىرى تۇرعىن الاپتارىنىڭ ءبىرى. بۇگىندە مۇندا 40 مىڭنان استام تۇرعىن تۇرادى. سوعان سايكەس، ىقشام اۋداندا ءتۇرلى الەۋمەتتىك نىساندار بوي كوتەرىپ، تۇرعىندارعا قولايلى جاعداي جاساۋ باعىتىندا اۋقىمدى جۇمىستار اتقارىلۋدا. اۋدان اۋماعىندا جاسىل جەلەكتەر، دەمالىس ورىندارى مەن سەرۋەندەۋ الاڭدارى ورنالاسقان. وسىعان بايلانىستى مۇندا اباتتاندىرۋ، سانيتارلىق تازالىقتى ساقتاۋ جانە تۇرعىندارعا جايلى ورتا قالىپتاستىرۋ جۇمىستارى تۇراقتى تۇردە جۇرگىزىلەدى.
ەكولوگيالىق اكتسياعا قالا جاستارى، ەرىكتىلەر جانە جاستار ۇيىمدارىنىڭ وكىلدەرى بەلسەندى قاتىستى. ءىس-شارا بارىسىندا قاتىسۋشىلار ىقشام اۋدانداعى №47 تۇرعىن ءۇيدىڭ اۋماعىندا تازالىق جۇمىستارىن جۇرگىزىپ، قۋراعان بۇتاقتار مەن تۇرمىستىق قالدىقتاردى جينادى.
ىزگى باستاماعا ۇيىتقى بولعان تاراز قالاسى جاستار رەسۋرستىق ورتالىعىنىڭ ديرەكتورى ازامات لەسبەكتىڭ ايتۋىنشا، «تازا قازاقستان» جالپىۇلتتىق ەكولوگيالىق اكتسياسى – قورشاعان ورتانى قورعاۋعا، قالا تازالىعىن ساقتاۋعا جانە تۇرعىنداردىڭ ەكولوگيالىق مادەنيەتىن قالىپتاستىرۋعا باعىتتالعان ماڭىزدى جوبا.
– تازالىق – اينالانى رەتكە كەلتىرۋ عانا ەمەس، ادامنىڭ تابيعاتقا، تۋعان جەرىنە دەگەن كوزقاراسىنىڭ كورىنىسى. بۇگىن «ۇلى دالا» ىقشام اۋدانىنداعى سەنبىلىككە قاتىسقان ءاربىر ازامات قالامىزدىڭ كوركەيۋىنە ءوز ۇلەسىن قوستى. ەكولوگيالىق مادەنيەت كۇندەلىكتى ادەتتەن، قاراپايىم ارەكەتتەن باستالادى. ەگەر ارقايسىمىز قورشاعان ورتاعا جاۋاپكەرشىلىكپەن قاراساق، تازا ءارى جايلى قالا قالىپتاستىرۋعا بىرگە قول جەتكىزەمىز، – دەدى ازامات لەسبەك.
اكتسياعا 50-دەن استام جاستار ۇيىمدارىنىڭ وكىلدەرى، ەرىكتىلەر مەن بەلسەندى جاستار قاتىستى. ناتيجەسىندە ىقشام اۋدان اۋماعىنان 1 توننادان استام قوقىس شىعارىلىپ، تۇرعىن ۇيلەردىڭ اينالاسى تازارتىلدى.
ايتا كەتەيىك، وسىنداي ەكولوگيالىق شارالار وبلىستىڭ بىرقاتار اۋداندارىندا دا ۇيىمداستىرىلۋدا. ەرىكتىلەر مەن جاستار اۋىل كوشەلەرىن، وزەن جاعالاۋلارىن، ورتالىق ساياباقتار مەن قوعامدىق ورىنداردى تازالاۋ جۇمىستارىن جۇرگىزۋدە.
اكتسيا بارىسىندا قاتىسۋشىلارعا قورشاعان ورتانى قورعاۋ، ەكولوگيالىق مادەنيەتتى قالىپتاستىرۋ جانە قوعامدىق ورىنداردا تازالىق ساقتاۋ جونىندە ءتۇسىندىرۋ جۇمىستارى جۇرگىزىلدى. ۇيىمداستىرۋشىلاردىڭ ايتۋىنشا، مۇنداي باستامالار تۇرعىنداردىڭ تابيعاتقا جاناشىرلىقپەن قاراۋىنا، تۋعان ولكەنىڭ تازالىعى مەن كوركەيۋىنە ۇلەس قوسۋىنا ىقپال ەتەدى.
جالپى، «تازا قازاقستان» اكتسياسى اياسىندا جامبىل وبلىسىندا اۋقىمدى جۇمىستار جۇزەگە اسىرىلۋدا. بۇگىنگى كۇنگە دەيىن وڭىردە 48,5 مىڭ جاسىل جەلەك وتىرعىزىلىپ، 3,5 مىڭ شاقىرىم كوشە جولدارى تازارتىلدى. سونداي-اق 831 شاقىرىم ارىق جۇيەلەرى مەن كانالدار رەتكە كەلتىرىلىپ، 685,5 مىڭ شارشى مەتر ساياباقتار مەن سكۆەرلەردىڭ اۋماعى اباتتاندىرىلدى. ناتيجەسىندە 6,9 مىڭ تونناعا جۋىق كۇل-قوقىس شىعارىلدى.
«تازا قازاقستان» اكتسياسى اياسىنداعى مۇنداي شارالار ءوڭىردىڭ ەكولوگيالىق احۋالىن جاقسارتۋمەن قاتار، قوعامدا تازالىق پەن جاۋاپكەرشىلىك مادەنيەتىن قالىپتاستىرۋعا، قورشاعان ورتاعا ۇقىپتى قاراۋ داعدىلارىن نىعايتۋعا زور ۇلەس قوسۋدا.
