2026 jylǧy 17 tamyzda «Taza Qazaqstan» jalpyūlttyq ekologiialyq aksiiasy aiasynda Taraz qalasyndaǧy «Ūly Dala» yqşam audanynda «Taza meken – taza bolaşaq» taqyrybynda ekologiialyq aksiia ūiymdastyryldy.
«Ūly Dala» yqşam audany – elımızdegı eŋ ırı tūrǧyn alaptarynyŋ bırı. Bügınde mūnda 40 myŋnan astam tūrǧyn tūrady. Soǧan säikes, yqşam audanda türlı äleumettık nysandar boi köterıp, tūrǧyndarǧa qolaily jaǧdai jasau baǧytynda auqymdy jūmystar atqaryluda. Audan aumaǧynda jasyl jelekter, demalys oryndary men seruendeu alaŋdary ornalasqan. Osyǧan bailanysty mūnda abattandyru, sanitarlyq tazalyqty saqtau jäne tūrǧyndarǧa jaily orta qalyptastyru jūmystary tūraqty türde jürgızıledı.
Ekologiialyq aksiiaǧa qala jastary, erıktıler jäne jastar ūiymdarynyŋ ökılderı belsendı qatysty. Is-şara barysynda qatysuşylar yqşam audandaǧy №47 tūrǧyn üidıŋ aumaǧynda tazalyq jūmystaryn jürgızıp, quraǧan būtaqtar men tūrmystyq qaldyqtardy jinady.
Izgı bastamaǧa ūiytqy bolǧan Taraz qalasy jastar resurstyq ortalyǧynyŋ direktory Azamat Lesbektıŋ aituynşa, «Taza Qazaqstan» jalpyūlttyq ekologiialyq aksiiasy – qorşaǧan ortany qorǧauǧa, qala tazalyǧyn saqtauǧa jäne tūrǧyndardyŋ ekologiialyq mädenietın qalyptastyruǧa baǧyttalǧan maŋyzdy joba.
– Tazalyq – ainalany retke keltıru ǧana emes, adamnyŋ tabiǧatqa, tuǧan jerıne degen közqarasynyŋ körınısı. Bügın «Ūly Dala» yqşam audanyndaǧy senbılıkke qatysqan ärbır azamat qalamyzdyŋ körkeiuıne öz ülesın qosty. Ekologiialyq mädeniet kündelıktı ädetten, qarapaiym äreketten bastalady. Eger ärqaisymyz qorşaǧan ortaǧa jauapkerşılıkpen qarasaq, taza ärı jaily qala qalyptastyruǧa bırge qol jetkızemız, – dedı Azamat Lesbek.
Aksiiaǧa 50-den astam jastar ūiymdarynyŋ ökılderı, erıktıler men belsendı jastar qatysty. Nätijesınde yqşam audan aumaǧynan 1 tonnadan astam qoqys şyǧarylyp, tūrǧyn üilerdıŋ ainalasy tazartyldy.
Aita keteiık, osyndai ekologiialyq şaralar oblystyŋ bırqatar audandarynda da ūiymdastyryluda. Erıktıler men jastar auyl köşelerın, özen jaǧalaularyn, ortalyq saiabaqtar men qoǧamdyq oryndardy tazalau jūmystaryn jürgızude.
Aksiia barysynda qatysuşylarǧa qorşaǧan ortany qorǧau, ekologiialyq mädeniettı qalyptastyru jäne qoǧamdyq oryndarda tazalyq saqtau jönınde tüsındıru jūmystary jürgızıldı. Ūiymdastyruşylardyŋ aituynşa, mūndai bastamalar tūrǧyndardyŋ tabiǧatqa janaşyrlyqpen qarauyna, tuǧan ölkenıŋ tazalyǧy men körkeiuıne üles qosuyna yqpal etedı.
Jalpy, «Taza Qazaqstan» aksiiasy aiasynda Jambyl oblysynda auqymdy jūmystar jüzege asyryluda. Bügıngı künge deiın öŋırde 48,5 myŋ jasyl jelek otyrǧyzylyp, 3,5 myŋ şaqyrym köşe joldary tazartyldy. Sondai-aq 831 şaqyrym aryq jüielerı men kanaldar retke keltırılıp, 685,5 myŋ şarşy metr saiabaqtar men skverlerdıŋ aumaǧy abattandyryldy. Nätijesınde 6,9 myŋ tonnaǧa juyq kül-qoqys şyǧaryldy.
«Taza Qazaqstan» aksiiasy aiasyndaǧy mūndai şaralar öŋırdıŋ ekologiialyq ahualyn jaqsartumen qatar, qoǧamda tazalyq pen jauapkerşılık mädenietın qalyptastyruǧa, qorşaǧan ortaǧa ūqypty qarau daǧdylaryn nyǧaituǧa zor üles qosuda.
