Jambyl oblysy äkımınıŋ orynbasary Serık Sälemov Şu audanyna arnaiy jūmys saparymen baryp, äleumettık nysandardyŋ jai-küiımen tanysyp, öndırıs oryndarynyŋ basşylarymen kezdestı. Sapar barysynda qoǧamdyq-saiasi tūraqtylyqty saqtau, bılım beru nysandarynyŋ jaǧdaiy, öndırıs salasyn damytu jäne eŋbek qauıpsızdıgı mäselelerı kün tärtıbıne şyǧaryldy.
Jūmys sapary aldymen audan äkımdıgınde ziialy qauym ökılderımen ötken kezdesuden bastaldy. Basqosuda öŋırdegı qoǧamdyq-saiasi ahual, qoǧamdaǧy tūraqtylyqty saqtau baǧytynda atqarylyp jatqan jūmystar, Memleket basşysy aiqyndaǧan «Zaŋ men tärtıp» qaǧidatyn jüzege asyru mäselelerı jan-jaqty talqylandy. Kezdesuge qatysuşylar öŋırdıŋ tūraqty damuy üşın qoǧamdyq kelısım men bırlıktıŋ maŋyzdylyǧyna toqtalyp, öz ūsynys-pıkırlerın ortaǧa saldy.
Odan keiın oblys äkımınıŋ orynbasary kürdelı jöndeuden ötıp jatqan Moiynqūm orta mektebıne baryp, qūrylys jūmystarynyŋ barysyn zerdeledı. Qazırgı taŋda jöndeu jūmystarynyŋ şamamen 60 paiyzy oryndalǧan. Nysanda merdıger ūiym ökılderıne qūrylys sapasyn qataŋ baqylauda ūstap, jūmysty belgılengen merzımde aiaqtau qajettıgı eskertıldı.
Jūmys sapary aiasynda Şu qalasyndaǧy 30 oryndyq «Alǧa» bastauyş mektebınıŋ de mäselesı nazardan tys qalmady. Soŋǧy jyldary bılım aluşylar sanynyŋ artuyna bailanysty tūrǧyndar tarapynan jaŋa bılım beru nysanyn salu turaly ūsynystar aitylyp keledı. Osyǧan bailanysty audan äkımdıgıne mäselenı jan-jaqty zerdelep, naqty ūsynystar äzırleu tapsyryldy.
Būdan keiın «Shengtai Biotech LTD. Fufeng Group» JŞS jügerı öŋdeu zauytynda käsıporyn basşylyǧymen kezdesu öttı. Kezdesu barysynda jergılıktı käsıpkerlermen özara ärıptestıktı nyǧaitu, öŋırdegı kolledjder men joǧary oqu oryndaryn tämamdaǧan mamandardy jūmysqa tartu, eŋbek qauıpsızdıgın qamtamasyz etu jäne öndırıstegı äleumettık jauapkerşılıktı arttyru mäselelerı söz boldy.
Jūmys saparynyŋ qorytyndysynda Serık Sälemov «Jibek Joly» arnaiy ekonomikalyq aimaǧyna baryp, ondaǧy öndırıs oryndarynyŋ qyzmetımen jäne jūmysşylarǧa jasalǧan eŋbek jaǧdaiymen tanysty.
Jūmys sapary barysynda köterılgen mäselelerdıŋ barlyǧy baqylauǧa alynyp, jauapty mekemelerge naqty tapsyrmalar berıldı. Öŋırdegı äleumettık nysandardyŋ sapaly jūmys ısteuı, öndırıstıŋ tūraqty damuy jäne qoǧamdyq tūraqtylyqty saqtau baǧytyndaǧy jūmystar aldaǧy uaqytta da jüielı türde jalǧasatyn bolady.
