Jambyl oblysynda Memleket basşysynyŋ Joldauynda belgılengen mındetterdı tüsındıru maqsatynda aqparattyq top müşelerı Taraz qalasy, Baizaq jäne Jambyl audandarynda bırqatar kezdesuler ötkızdı.
Kezdesulerge jergılıktı tūrǧyndar, jastar, agroönerkäsıp keşenı men bılım salasynyŋ ökılderı, etnomädeni bırlestıkterdıŋ jetekşılerı jäne eŋbek ūjymdary qatysty.
Aqparattyq top ekı baǧyt boiynşa jūmys ıstedı. Onyŋ qūramynda Qūryltai deputaty Äbılhaiyr Tamabek, Qazaqstan Halyq keŋesınıŋ müşesı Ualihan Bolatbek, salalyq vise-ministrler jäne Ūlttyq ekonomika ministrlıgınıŋ Arnaiy baǧdarlamalar komitetınıŋ töraǧasy boldy.
Kezdesuler barysynda Joldaudyŋ negızgı basymdyqtary tüsındırılıp, öŋırdıŋ özektı mäselelerı talqylandy. Atap aitqanda, auyl şaruaşylyǧyn damytu, su resurstaryn tiımdı paidalanu, irrigasiialyq jüielerdı jaŋǧyrtu, öndırıstı örkendetu, şarualardy qoldau jäne auyldyq jerlerdegı käsıpkerlıktı damytu mäselelerıne basymdyq berıldı. Sonymen qatar tūrǧyndar äleumettık jäne infraqūrylymdyq mäseleler boiynşa öz ūsynys-pıkırlerın ortaǧa saldy.
Agroönerkäsıp keşenı ökılderımen kezdesude Qūryltai deputaty Äbılhaiyr Tamabek Jambyl oblysy üşın su resurstaryn tiımdı paidalanu mäselesınıŋ maŋyzdylyǧyna toqtaldy. Onyŋ aituynşa, öŋırde halyq pen şaruaşylyq nysandarynyŋ edäuır bölıgı jer asty suyn paidalanady. Alaida su qory şeksız emes. Sondyqtan ony ūtymdy paidalanu men saqtau – bügıngı künnıŋ maŋyzdy mındetterınıŋ bırı ekenın atap öttı.
Deputat Memleket basşysynyŋ Joldauynda Su resurstarynyŋ ūlttyq aqparattyq jüiesın qūru jūmystaryn jedel aiaqtau tapsyrylǧanyn atap öttı. Būl jüie su kölemın naqty esepke aluǧa, ony tiımdı basqaruǧa jäne su taratu jelılerındegı şyǧyndardy azaituǧa mümkındık beredı.
Jalpy, kezdesuler aşyq pıkır almasu formatynda ötıp, tūrǧyndar özderın tolǧandyrǧan sūraqtaryn qoiyp, ūsynystaryn jetkızdı. Aqparattyq top müşelerı Joldauda belgılengen mındetterdı jüzege asyru naqty nätijelerge baǧyttaluy kerektıgın atap öttı. Sondai-aq öŋırdıŋ damuyna qatysty mäselelerdı şeşude memlekettık organdar men qoǧam arasyndaǧy özara bailanystyŋ maŋyzdylyǧyna nazar audardy.
