جەتىسۋ وبلىسىندا «تازا قازاقستان» رەسپۋبليكالىق ەكولوگيالىق اكتسياسى اياسىندا جىل بويى جۇزەگە اسىرىلعان ەكولوگيالىق باستامالاردىڭ قورىتىندىسىن شىعارۋعا ارنالعان «ECOFINAL 2025: 100 تازالىق قادامى» اتتى قورىتىندى ءىس-شارا ءوتتى.
قورشاعان ورتانى قورعاۋ، تازالىق مادەنيەتىن قالىپتاستىرۋ جانە قوعامنىڭ ەكولوگيالىق جاۋاپكەرشىلىگىن ارتتىرۋ – تۇراقتى دامۋدىڭ ماڭىزدى باعىتتارىنىڭ ءبىرى. وسى ماقساتتا ۇيىمداستىرىلعان ءىس-شارا «تازا قازاقستان» اكتسياسى اياسىندا ءبىر جىل بويى اتقارىلعان جۇمىستاردى سارالاپ، ەكولوگيالىق باستامالاردىڭ ناتيجەسىن كوپشىلىككە ۇسىنۋعا باعىتتالدى. سونىمەن قاتار ەكولوگيالىق ۆولونتەرلىكتى دامىتۋ، ۇزدىك تاجىريبەلەردى قولداۋ جانە تۇرعىنداردى تابيعاتتى ايالاۋعا بەلسەندى تۇردە تارتۋ كوزدەلدى.
اتالعان باستامانىڭ باستى ەرەكشەلىگى – ونىڭ جەتىسۋ وبلىسىنىڭ بارلىق اۋدان مەن قالالارىندا كەڭ كولەمدە جۇزەگە اسىرىلۋى. 3-25 جەلتوقسان ارالىعىندا وبلىس اۋماعىندا «100 تازالىق قادامى» اتتى كوپكۇندىك ەكولوگيالىق اكتسيا وتكىزىلىپ، بارلىق اۋدان مەن قالالاردا 100 ەكولوگيالىق سەنبىلىك ۇيىمداستىرىلدى. بۇل شارالار تۇرعىندار اراسىندا ەكولوگيالىق مادەنيەتتى قالىپتاستىرۋعا، ورتاق جاۋاپكەرشىلىك پەن بىرلىك رۋحىن نىعايتۋعا ىقپال ەتتى.
«Qosyl» جوباسى اياسىندا ۇزدىك دەپ تانىلعان ەسكەلدى، سارقان جانە اقسۋ اۋداندارى ماراپاتتالدى. اتالعان ماراپاتتاردى «تامشىبۇلاق» قوعامدىق بىرلەستىگىنىڭ باسشىسى تۋلەميسوۆا جانات ەرحانقىزى تابىستادى. سونىمەن قاتار اۋداندىق جاستار رەسۋرستىق ورتالىقتارىنىڭ جەتەكشىلەرىنە العىس حاتتار بەرىلدى. ال جوعارى وقۋ ورىندارى مەن كوللەدجدەر، سونداي-اق بەلسەندى ۆولونتەرلەر «Jetisu jastary» كمم ديرەكتورى ۆانكەەۆ شاميل دۇيسەنعازىۇلىنىڭ اتىنان ماراپاتتالدى. بۇل - جاستاردىڭ ەكولوگيالىق باستامالارعا قوسقان ۇلەسىنە بەرىلگەن جوعارى باعا بولدى.
سالتاناتتى جيىن اياسىندا جاۋاپتى سالا وكىلدەرى قۇتتىقتاۋ ءسوز سويلەپ، قاتىسۋشىلارعا كونتسەرتتىك باعدارلاما ۇسىنىلدى. قورىتىندى ءىس-شارا ەكولوگيالىق مادەنيەتتى كەڭىنەن ناسيحاتتاۋعا، جاستاردىڭ ازاماتتىق بەلسەندىلىگىن ارتتىرۋعا جانە قورشاعان ورتاعا دەگەن جاۋاپكەرشىلىكتى كۇشەيتۋگە باعىتتالعان ماڭىزدى ديالوگ الاڭىنا اينالدى.
اتالعان ءىس-شاراعا ۆولونتەرلىك ۇيىمداردىڭ جەتەكشىلەرى مەن بەلسەندى ۆولونتەرلەر، اۋداندىق جانە قالالىق جاستار رەسۋرستىق ورتالىقتارىنىڭ وكىلدەرى، جوعارى وقۋ ورىندارى مەن كوللەدج ستۋدەنتتەرى قاتىستى.
جەتىسۋ ۋنيۆەرسيتەتىنىڭ ستۋدەنتى جەتپىسباي ايارۋ الىبيقىزىنىڭ ايتۋىنشا: «ECOFINAL 2025» سەكىلدى باستامالار جاستاردىڭ ەكولوگيالىق جاۋاپكەرشىلىگىن ارتتىرۋدا ماڭىزدى ءرول اتقارادى. ۆولونتەرلىك ارقىلى ءبىز تەك اۋماقتى تازالاپ قانا قويماي، قوعامعا تابيعاتتى ايالاۋدىڭ ماڭىزىن ۇلگى ارقىلى كورسەتەمىز. «تازا قازاقستان» اكتسياسى جاستاردى ءبىر ماقساتقا بىرىكتىرىپ، ورتاق جاۋاپكەرشىلىك سەزىمىن قالىپتاستىردى. وسىنداي جۇيەلى ەكولوگيالىق جوبالار الداعى ۋاقىتتا دا جالعاسىن تابۋى ءتيىس».
