جامبىل وبلىسىندا مەملەكەت باسشىسى قاسىم-جومارت توقاەۆتىڭ ءار جىلدارى ايتقان وي-تۇجىرىمدارى مەن ەل دامۋىنا قاتىستى پايىمدارى توپتاستىرىلعان «ادىلەتتى قوعامعا – شىنشىل ءسوز» كىتابىنىڭ تانىستىرىلىمى ءوتتى.
رۋحاني-تانىمدىق شاراعا وبلىس اكىمى ەربول قاراشوكەەۆ، زيالى قاۋىم وكىلدەرى، اقىن-جازۋشىلار، جۋرناليستەر، ازاماتتىق قوعام وكىلدەرى مەن جاستار قاتىستى.
جيىندا كىتاپتىڭ مازمۇنى مەن وندا قامتىلعان نەگىزگى باعىتتار تالقىلانىپ، ونىڭ قوعام ءۇشىن ماڭىزى ءسوز بولدى.
ءوڭىر باسشىسى جيناقتا قازاقستاننىڭ ساياسي، ەكونوميكالىق جانە قوعامدىق جاڭعىرۋىنىڭ يدەيالىق نەگىزدەرى، مەملەكەتتىلىكتى نىعايتۋ، ادىلەتتى قوعام قالىپتاستىرۋ جانە ازاماتتاردىڭ ءال-اۋقاتىن ارتتىرۋعا باعىتتالعان كوزقاراستار كورىنىس تاپقانىن اتاپ ءوتتى.
– مەملەكەت باسشىسىنىڭ جامبىل جەرىنە ايرىقشا نازار اۋدارىپ، تۇراقتى قولداۋ كورسەتىپ كەلە جاتقانىن بارشاڭىز جاقسى بىلەسىزدەر. پرەزيدەنتتىڭ وبلىستىڭ الەۋمەتتىك-ەكونوميكالىق دامۋىن جەدەلدەتۋگە، جاڭا وندىرىستەردى ىسكە قوسۋعا، حالىقتىڭ ءال-اۋقاتى مەن تۇرمىس ساپاسىن ارتتىرۋعا، الەۋمەتتىك ينفراقۇرىلىمدى جاڭعىرتۋعا باعىتتالعان باستامالارى ءوڭىرىمىزدىڭ كەلەشەگى ءۇشىن ايرىقشا ماڭىزعا يە.
سونىمەن قاتار اۋليەاتا ءوڭىرىنىڭ تاريحي-مادەني مۇراسىن ساقتاۋ، ۇلتتىق قۇندىلىقتاردى دارىپتەۋ جانە رۋحاني الەۋەتىن ارتتىرۋ باعىتتارىنا دا ەرەكشە ءمان بەرىلۋدە. مەملەكەت تاراپىنان كورسەتىلىپ وتىرعان قولداۋ – بىزگە ارتىلعان ۇلكەن سەنىم ءارى زور جاۋاپكەرشىلىك. سوندىقتان پرەزيدەنت ايقىنداعان ستراتەگيالىق مىندەتتەردى ساپالى جۇزەگە اسىرىپ، ولاردىڭ ناقتى ناتيجەسىن حالىقتىڭ كۇندەلىكتى ومىرىنەن كورىنەتىندەي ەتۋ – ءبىزدىڭ ورتاق مىندەتىمىز، – دەدى ەربول قاراشوكەەۆ.
وبلىس اكىمى اتاپ وتكەندەي، «ادىلەتتى قوعامعا – شىنشىل ءسوز» جيناعى وسى جاۋاپكەرشىلىكتى تەرەڭ سەزىنۋگە ۇندەيدى. كىتاپتا ەل دامۋىنا قاتىستى ماڭىزدى ويلارمەن قاتار، مەملەكەت پەن قوعام الدىنداعى جاۋاپكەرشىلىك، زامان وزگەرىستەرىن دۇرىس باعامداۋ جانە بولاشاقتىڭ باعدارىن ايقىنداۋ ماسەلەلەرى قامتىلعان.
جيناققا تاۋەلسىزدىكتىڭ العاشقى كەزەڭىنەن بۇگىنگە دەيىنگى باياندامالاردا، ماقالالاردا، سۇحباتتار مەن ەڭبەكتەردە ايتىلعان نەگىزگى وي-تۇجىرىمدار ەنگىزىلگەن. مەملەكەت، قوعام، ازامات، زاڭ، ءبىلىم، عىلىم، مادەنيەت جانە ەل كەلەشەگىنە قاتىستى پايىمدار ءبىرتۇتاس مازمۇندىق جۇيەگە كەلتىرىلگەن. بۇل وقىرمانعا قازىرگى رەفورمالاردىڭ يدەيالىق باستاۋىن، ولاردىڭ قالىپتاسۋ جولىن جانە مەملەكەتتىك ساياساتتىڭ باسىمدىقتارىنا اينالۋ ۇدەرىسىن تۇسىنۋگە مۇمكىندىك بەرەدى.
تانىستىرىلىم بارىسىندا قازاقستان جۋرناليستەر وداعىنىڭ جامبىل وبلىسى بويىنشا توراعاسى جاڭاباي ميلليونوۆ، جازۋشى، جۋرناليست، قازاقستاننىڭ ەڭبەك سىڭىرگەن قايراتكەرى، حالىقارالىق «الاش» ادەبي سىيلىعىنىڭ لاۋرەاتى كوسەمالى ءساتتىبايۇلى، پەداگوگيكا عىلىمدارىنىڭ دوكتورى، پروفەسسور، ش.مۇرتازا اتىنداعى حالىقارالىق تاراز ۋنيۆەرسيتەتىنىڭ رەكتورى ماحمەتعالي سارىبەكوۆ، «جاڭارۋ» سىبايلاس جەمقورلىققا قارسى جالپىۇلتتىق قوزعالىسى» رەسپۋبليكالىق قوعامدىق بىرلەستىگىنىڭ وبلىستىق فيليالىنىڭ ديرەكتورى قاسىمحان تولەنديەۆ، جامبىل وبلىستىق «زناميا ترۋدا» گازەتىنىڭ باس رەداكتورى ليۋدميلا مەلنيك جانە جامبىل وبلىستىق جاستار رەسۋرستىق ورتالىعىنىڭ ديرەكتورى ايبەك كادراليەۆ كىتاپتا كوتەرىلگەن ماسەلەلەرگە قاتىستى ورامدى ويلارىن ورتاعا سالدى.
جيىن سوڭىندا قاتىسۋشىلار كىتاپتىڭ مازمۇنى مەن نەگىزگى يدەيالارى جونىندە پىكىر الماسىپ، ونىڭ قوعامدىق-ساياسي جانە رۋحاني-تانىمدىق ماڭىزىنا توقتالدى.
