Şymkent qalasy boiynşa Ūlttyq qauıpsızdık komitetı departamentı basşysynyŋ būrynǧy bırınşı orynbasary Manat Sarbasovqa qatysty qylmystyq ıs qaita qaralady, dep habarlaidy "Adyrna" ūlttyq portaly.
Kassasiialyq sot oǧan taǧaiyndalǧan 12 jyldyq bas bostandyǧynan aiyru jazasy turaly ükımnıŋ küşın joidy.
2025 jylǧy qazanda alqabiler Manat Sarbasovty para alu, aqşany zaŋdastyru jäne qyzmettık mındetterın oryndamau boiynşa kınälı dep tanyǧan. Sot ony 12 jylǧa bas bostandyǧynan aiyrǧan. Sonymen qatar ol alaiaqtyq jäne özge de bırqatar aiyp boiynşa aqtalǧan.
Tergeu nūsqasyna säikes, Sarbasov käsıpkerden jekemenşık mektepke qamqorlyq körsetu üşın 70 million teŋge alǧan. Sondai-aq ol būl qarajatty jyljymaityn mülık satyp aluǧa jūmsap, keiın odan tüsken tabys arqyly aqşany zaŋdastyrdy dep aiyptalǧan.
Būdan bölek, oǧan medisinalyq jabdyq satyp alu kezınde 92 million teŋgeden astam qarajattyŋ jymqyryluyna bailanysty qyzmettık äreketsızdık jasady degen aiyp taǧylǧan. Atalǧan ıs boiynşa basqa da būrynǧy şeneunıkter men käsıpkerler jauapqa tartylǧan.
Sarbasovtyŋ advokaty Jasūlan Äsılbekovtıŋ aituynşa, qorǧau tarapy alqabilerge qoiylǧan sūraqtardyŋ kürdelı ärı zaŋ terminderıne toly bolǧanyn alǧa tartqan. Onyŋ pıkırınşe, sūraqtardyŋ tūjyrymdary tüsınıksız bolǧan.
Kassasiialyq sot osy mäseleler boiynşa zaŋbūzuşylyqtar bolǧanyn moiyndap, 12 jyldyq jaza taǧaiyndalǧan ükımnıŋ küşın joidy. Endı qylmystyq ıs qaita qaralady.
Manat Sarbasov Şymkent qalasy boiynşa ŪQK departamentı basşysynyŋ būrynǧy bırınşı orynbasary bolǧan. Ol ūlttyq qauıpsızdık organdarynda 20 jylǧa juyq qyzmet atqarǧan.
