فوتو: Shutterstock
2026 جىلعى 5 جەلتوقساندا استانادا PR ROOM ۇيىمداستىراتىن كرەاتيۆتى يندۋستريا فورۋمى وتەدى. ساعات 11:00-دەن 18:00-گە دەيىن جالعاساتىن شارادا ءىس-شارالاردى ۇيىمداستىرۋ، ماركەتينگ، PR, كينو، مۋزىكا جانە زاماناۋي مەديانى دامىتۋ ماسەلەلەرى تالقىلانادى.
فورۋمعا Comic Con, Astana Concert, Freedom QJ League, Almaty Open ATP 250, Mega Silk Way جانە Freedom Holding Corp. كومپانيالارىنىڭ وكىلدەرى قاتىسادى. ولار ءىرى ءىس-شارالاردى ۇيىمداستىرۋ، بيلەتتەردى ساتۋ، سەرىكتەستەر تارتۋ جانە جوبالاردى قارجىلاندىرۋ تاجىريبەسىمەن بولىسەدى.
سونداي-اق كاسىبي قاۋىمداستىقتاردى دامىتۋعا ارنالعان سەسسيالار ۇيىمداستىرىلادى. وندا PR ROOM نەگىزىن قالاۋشى اينۇر بايعوجا، Freedom Holding Corp. وكىلى نينا نۋرامبەكوۆا جانە باسقا دا ماماندار ءوز تاجىريبەلەرىن ورتاعا سالادى.
بۇدان بولەك، كينو، مۋزىكا، YouTube-تا كونتەنتتى ىلگەرىلەتۋ، ماركەتينگ پەن PR باعىتتارى بويىنشا ارنايى كەزدەسۋلەر وتەدى. فورۋم سپيكەرلەرى قاتارىندا رەجيسسەر جاندوس قۇسايىن، اكتريسا اينۇر نيازوۆا، Tolqyn Film Fund PR-ديرەكتورى ناۋات ايتۋعانوۆا، Genesis CSP ديرەكتورى زاڭعار بوزتاەۆ جانە باسقا سالا ماماندارى بار.
«زاماناۋي مەديانىڭ بۇگىنگى كەلبەتى: «ادىرنا» پورتالىنىڭ مۇمكىندىكتەرى» تاقىرىبى دا جەكە تالقىلانادى. بۇل سەسسيادا ۇلتتىق مەديانىڭ مۇمكىندىكتەرى مەن دامۋ باعىتتارى ءسوز بولادى.
ۇيىمداستىرۋشىلاردىڭ ايتۋىنشا، فورۋم كرەاتيۆتى يندۋستريا ماماندارىنا تاجىريبە الماسىپ، كاسىبي بايلانىس ورناتۋعا جانە جاڭا جوبالاردى تالقىلاۋعا مۇمكىندىك بەرەدى.
ءىس-شاراعا قاتىسۋ اقىلى.
