تۇركى مەملەكەتتەرى ۇيىمىنا (تمۇ) مۇشە ەلدەردىڭ ورتاق اقپاراتتىق كەڭىستىگىن دامىتۋ ازەربايجاننىڭ تۇركى الەمىمەن ىنتىماقتاستىعىنىڭ ماڭىزدى باعىتتارىنىڭ ءبىرى بولىپ قالا بەرەدى. بۇل تۋرالى Report جازدى، دەپ حابارلايدى "ادىرنا".
بۇل جونىندە ازەربايجاننىڭ مەديا جانە حابار تاراتۋ كەڭەسىنىڭ حالىقارالىق بايلانىستار جانە قۇجات اينالىمى دەپارتامەنتىنىڭ ديرەكتورى راسيم باعيروۆ استانادا وتكەن تمۇ-عا مۇشە ەلدەردىڭ باق جانە اقپارات ماسەلەلەرىنە جاۋاپتى مينيسترلەرى مەن جوعارى لاۋازىمدى تۇلعالارىنىڭ VIII كەزدەسۋىندە مالىمدەدى.
ونىڭ ايتۋىنشا، پرەزيدەنت يلحام اليەۆتىڭ باسشىلىعىمەن تۇركى الەمىمەن بايلانىستى نىعايتۋ ازەربايجان سىرتقى ساياساتىنىڭ نەگىزگى باسىمدىقتارىنىڭ ءبىرى بولىپ قالا بەرەدى. ال مەديا جانە اقپارات سالاسىنداعى ىنتىماقتاستىق وسى قارىم-قاتىناستاردىڭ ماڭىزدى قۇرامداس بولىگى سانالادى.
باعيروۆ سەنىمدى جاڭالىقتارمەن تۇراقتى الماسۋ، اقپارات اگەنتتىكتەرى مەن تەلەراديو كومپانيالارى اراسىنداعى بايلانىستى كەڭەيتۋ ورتاق مادەني جانە تاريحي مۇرانى ناقتى بىرلەسكەن جوبالارعا اينالدىرۋعا مۇمكىندىك بەرەتىنىن اتاپ ءوتتى. ول مىسال رەتىندە تۇركى اقپارات اگەنتتىكتەرى اليانسىن (ATNA) اتادى.
سونىمەن قاتار ول بىرلەسكەن دەرەكتى فيلمدەر ءتۇسىرۋدىڭ، مادەني-اعارتۋشىلىق باعدارلامالار ازىرلەۋدىڭ، مەديا جوبالارمەن الماسۋدىڭ جانە جۋرناليستەردىڭ كاسىبي ساپارلارىن ۇيىمداستىرۋدىڭ ماڭىزدىلىعىنا توقتالدى. مۇنداي جۇمىستار ءوزارا تۇسىنىستىكتى نىعايتىپ، تۇركى الەمىنىڭ ۇستانىمىن حالىقارالىق اۋديتورياعا جەتكىزۋگە ىقپال ەتەدى.
باعيروۆ جاساندى ينتەللەكتىنى ەنگىزۋ ماسەلەسىنە دە ەرەكشە نازار اۋداردى. ونىڭ ايتۋىنشا، جاڭا تەحنولوگيالار اقپارات ءوندىرۋ، اۋدارۋ جانە تاراتۋ مۇمكىندىكتەرىن كەڭەيتەدى. الايدا جاساندى ينتەللەكت كومەگىمەن جاسالعان سۋرەتتەر، اۋديو جانە بەينەماتەريالداردىڭ كوبەيۋى كونتەنتتىڭ شىنايىلىعىن تەكسەرۋدى قيىنداتىپ وتىر.
ونىڭ پىكىرىنشە، باق پەن مەملەكەتتىك كوممۋنيكاتسيالاردا جاساندى ينتەللەكتىنى قولدانۋ ادام باقىلاۋىمەن، رەداكتسيالىق جاۋاپكەرشىلىكپەن جانە قۇپيا دەرەكتەردى قورعاۋمەن قاتار ءجۇرۋى كەرەك. تمۇ ەلدەرىنىڭ ىنتىماقتاستىعى اقپاراتتىق قاۋىپ-قاتەرلەرگە قارسى تۇرۋ تاجىريبەسىمەن الماسۋعا جانە فاكتىلەردى تەكسەرۋ تەتىكتەرىن جەتىلدىرۋگە مۇمكىندىك بەرەدى.
سونداي-اق باعيروۆ ازەربايجاننىڭ تۇركيا، قازاقستان جانە وزبەكستانمەن ەكىجاقتى مەديا ىنتىماقتاستىعىنىڭ دامۋى تۋرالى ايتتى. اتاپ ايتقاندا، مەموراندۋمداردى ىسكە اسىرۋ، مەديا تۋرلار ۇيىمداستىرۋ، ءبىلىم بەرۋ جانە كاسىبي تاجىريبە الماسۋ باعىتىنداعى جۇمىستارعا توقتالدى.
ول جالعان اقپاراتقا توزىمدىلىك كاسىبي دەڭگەيى جوعارى باق-قا، قوعامدى ۋاقتىلى اقپاراتتاندىرۋعا جانە ازاماتتاردىڭ مەدياساۋاتتىلىعىنا بايلانىستى ەكەنىن اتاپ ءوتتى. وسى ورايدا وڭىرلىك رەداكتسيالاردى قولداۋ، اقپاراتتى تەكسەرۋ، تسيفرلىق قاۋىپسىزدىك، مۋلتيمەديالىق ونىمدەر ازىرلەۋ جانە جاساندى ينتەللەكتىنى جاۋاپكەرشىلىكپەن پايدالانۋ سالالارىندا ماماندار دايارلاۋ ماڭىزدى.
بۇدان بولەك، ازەربايجان وكىلى حالىقارالىق ديالوگتى دامىتۋدا شۋشا جاھاندىق مەديافورۋمى مەن 2026 جىلعى 1 قازاندا باكۋدە وتكەن ازياداعى ءوزارا ءىس-قيمىل جانە سەنىم شارالارى كەڭەسىنىڭ (اوسشك) العاشقى مەديافورۋمىنىڭ ماڭىزىن اتاپ ءوتتى. بۇل الاڭدار اقپاراتقا دەگەن سەنىمدى نىعايتۋعا جانە باق اراسىنداعى ىنتىماقتاستىقتى دامىتۋعا باعىتتالعان.
