قازاقستاننىڭ حالىق ءارتىسى، كومپوزيتور، پروفەسسور باقير باياحۋنوۆ 93 جاسىندا دۇنيەدەن ءوتتى. قارالى حاباردى قۇرمانعازى اتىنداعى قازاق ۇلتتىق كونسەرۆاتورياسى جەتكىزدى، دەپ حابارلايدى "ادىرنا".
«قۇرمانعازى اتىنداعى قازاق ۇلتتىق كونسەرۆاتورياسى قازاقستاننىڭ كورنەكتى كومپوزيتورى، پەداگوگ، قوعام قايراتكەرى، پروفەسسور باقير ياحياۇلى باياحۋنوۆتىڭ دۇنيەدەن وتكەنىن تەرەڭ كۇيزەلىسپەن حابارلايدى»، دەلىنگەن وقۋ ورنىنىڭ حابارلاماسىندا.
باقير ياحياۇلى باياحۋنوۆ 1933 جىلى دۇنيەگە كەلگەن. ول قازاق كسر حالىق ءارتىسى جانە قازاق كسر ونەرىنە ەڭبەك سىڭىرگەن قايراتكەر اتاقتارىنا يە بولعان.
كومپوزيتور بۇكىل ءومىرىن قازاقستاننىڭ كاسىبي مۋزىكا ونەرىن دامىتۋعا ارناعان. الماتى كونسەرۆاتورياسىن ءتامامداپ، كەيىن وسى وقۋ ورنىندا 40 جىلدان استام ساباق بەرگەن.
ول بىرنەشە بۋىن كاسىبي مۋزىكانت تاربيەلەپ، وتاندىق كومپوزيتورلىق مەكتەپتىڭ دامۋىنا ەلەۋلى ۇلەس قوستى.
باقير باياحۋنوۆ ورتالىق ازياداعى دۇنگەن ۇلتىنان شىققان تۇڭعىش كاسىبي كومپوزيتور بولعان. ول شىعارمالارىندا ەۋروپالىق اكادەميالىق مۋزىكانى، قازاقتىڭ مۋزىكالىق مادەنيەتىن جانە شىعىس حالىقتارىنىڭ اۋەندەرىن ۇشتاستىرعان.
كومپوزيتوردىڭ شىعارماشىلىق مۇراسىندا جەتى سيمفونيا، كوپتەگەن ۆوكالدىق، حور، كامەرالىق جانە اسپاپتىق شىعارمالار بار.
«باقير ياحياۇلى باياحۋنوۆتىڭ دۇنيەدەن ءوتۋى قازاقستاننىڭ مۋزىكالىق قاۋىمداستىعى ءۇشىن ورنى تولماس قازا. ونىڭ ەسىمى، شىعارمالارى مەن پەداگوگيكالىق مۇراسى وتاندىق ونەر تاريحىندا، ارىپتەستەرى مەن شاكىرتتەرىنىڭ جادىندا ماڭگى ساقتالادى»، دەپ حابارلادى كونسەرۆاتوريا.
وقۋ ورنىنىڭ باسشىلىعى، وقىتۋشىلارى، قىزمەتكەرلەرى مەن ستۋدەنتتەرى مارقۇمنىڭ وتباسىنا جانە جاقىندارىنا كوڭىل ايتتى.
قازاقستاننىڭ مادەنيەت جانە اقپارات مينيسترلىگى دە كومپوزيتوردىڭ قايتىس بولۋىنا بايلانىستى كوڭىل ايتۋ حابارلاماسىن جاريالادى.
«باقير ياحياۇلى بار عۇمىرىن مۋزىكا ونەرىنە ارناپ، وتاندىق كومپوزيتورلىق مەكتەپتىڭ دامۋىنا ەلەۋلى ۇلەس قوستى. قازاقتىڭ مۋزىكالىق مۇراسىن، شىعىس حالىقتارىنىڭ اۋەندەرىن ەۋروپالىق اكادەميالىق مۋزىكا داستۇرىمەن ۇشتاستىرعان تۋىندىلارى ەلىمىزدىڭ رۋحاني قازىناسىن بايىتتى»، دەلىنگەن مينيسترلىك حابارلاماسىندا.
ۆەدومستۆو كومپوزيتوردىڭ ۇستازدىق ەڭبەگىن دە اتاپ ءوتتى.
«ول شاكىرتتەرىنە ءبىلىم بەرىپ قانا قويماي، ونەردىڭ قادىر-قاسيەتىن ۇعىندىرىپ، شىعارماشىلىق جولدا باعىت-باعدار كورسەتتى. باقير ياحياۇلىنىڭ باي شىعارماشىلىق مۇراسى، ۇستازدىق ونەگەسى مەن جارقىن بەينەسى ەل جادىندا ماڭگى ساقتالادى»، دەپ مالىمدەدى مينيسترلىك.
