الماتىدا وتكەن BeWoman ايەلدەر فورۋمىندا رەسەيلىك كوۋچ الەكسەي سيتنيكوۆتىڭ ءسوزى قوعامدا ۇلكەن نارازىلىق تۋدىردى، دەپ حابارلايدى "ادىرنا" ۇلتتىق پورتالى.
فورۋمدى Forbes Kazakhstan تىزىمىنە ەنگەن ميللياردەر سەرگەي كاننىڭ جۇبايى جاننا كان ۇيىمداستىرعان.
قوعام بەلسەندىسى ارمان شوراەۆ Facebook پاراقشاسىندا سيتنيكوۆ پەن جاننا كاندى ۋكرايناداعى «ميروتۆورەتس» بازاسىنا ەنگىزۋدى سۇراپ، ولاردىڭ ء«پۋتيندى قولدايتىنىن ءارى سوعىستى اقتايتىنىن» جازدى.
«وسى (جاننا كان) شەنگەن ايماعىن تەك تەلەارنادان عانا كورە بەرسىن»، — دەپ جازدى شوراەۆ.
ءىس-شارا بارىسىندا الەكسەي سيتنيكوۆ رەسەي پرەزيدەنتى ۆلاديمير ءپۋتيندى اشىق ماقتاپ، ءسوز سويلەگەن. ءول پۋتيندى «ەرەكشە كوشباسشى» رەتىندە سيپاتتاعانى كوپتىڭ اشۋىنا ءتيدى.
«پۋتينگە قانشاما رەت شابۋىل جاسالدى. 55 ەل وعان قارسى شىقتى، بىراق ول ءبارىبىر جەڭىپ كەلەدى. ترامپتىڭ ونى قالاي قارسى العانىن قاراڭىزشى — ونداي قۇرمەت ەشكىمگە كورسەتىلمەيدى»، — دەدى ول.
ايتا كەتەيىك، رەسەيلىك كوۋچ سيتنيكوۆ ءوزىن كەلىسسوزدەر مەن كوشباسشىلىق بويىنشا ساراپشى رەتىندە تانىستىرادى. ول 1990 جىلدارى ساياسي كونسالتينگ سالاسىندا جۇمىس ىستەپ، رەسەي مەن شەتەلدەگى سايلاۋ ناۋقاندارىنا قاتىسقان. قازىر ونىڭ Instagram پاراقشاسىندا شامامەن 900 مىڭ جازىلۋشىسى بار، الايدا كەيبىر ساراپشىلار ونى «جالعان ەكسپەرت» دەپ اتايدى.
فورۋم ۇيىمداستىرۋشىسى جاننا كان دا بۇعان دەيىن قوعام تاراپىنان سىنعا ۇشىراعان. ول جاقىندا سالىق كودەكسىنە قاتىستى پىكىرىندە:
«قازاقستاندىقتار جاڭا قاڭتار وقيعاسى بولماس ءۇشىن كوبىرەك جۇمىس ىستەپ، سالىق تولەۋى كەرەك»، — دەپ، نارازىلىق تۋدىرعان.
