تۇركيانىڭ كولىك ءمينيسترى ابدۋلقادير ۋرالوگلۋ تاس جولدا ساعاتىنا 224 شاقىرىم جىلدامدىقپەن جۇرگەن ۆيدەوسىن الەۋمەتتىك جەلىدە جاريالاپ، ەرەجە بۇزعانى ءۇشىن ايىپپۇل تولەدى، دەپ حابارلايدى “ادىرنا” ۇلتتىق پورتالى.
كولىك ءمينيسترىنىڭ مەملەكەتتىك ءانۇران اۋەنىمەن جىلدامدىعىن ساعاتىنا 224 شاقىرىمعا جەتكىزۋى الەۋمەتتىك جەلىدە ۇلكەن شۋ تۋدىردى. ويتكەنى تۇرىك تاس جولدارىندا رۇقسات ەتىلگەن ماكسيمالدى جىلدامدىق — ساعاتىنا 140 شاقىرىم.
وسىدان كەيىن ۋرالوگلۋ تاعى ءبىر جازبا جاريالاپ، وندا رەسمي تۇردە ايىپپۇل تولەگەنىن جازعان.
«انكارا-نيگدە جولىنىڭ سوڭعى جاعدايىن كورۋ ءۇشىن رولگە ءوزىم وتىردىم. سول ساتتە ونشا ءمان بەرمەي، از ۋاقىتقا جىلدامدىقتى ارتتىردىم. ۆيدەومەن ءبولىسىپ، ءوزىمدى ءوزىم اشكەرەلەدىم. جىلدامدىق ەرەجەلەرىن ساقتاۋ بارىمىزگە مىندەتتى. ءبىزدىڭ جول قىزمەتى تاراپىنان قاجەتتى جازالاۋ شاراسى قولدانىلدى. ەندى حالىققا بۇدان بىلاي مۇقيات بولاتىنىمدى حابارلايمىن» - دەپ جازدى مينيستر.
