Äl-Farabi atyndaǧy Qazaq ūlttyq universitetınde sabaq üstınde oqytuşyǧa jūmystan bosatylǧany turaly habarlanǧan sät tüsırılgen video äleumettık jelılerde tarady, dep habarlaidy "Adyrna" ūlttyq portaly.
Jazba qoǧamda qyzu talqylanyp, qoldanuşylar oqytuşyǧa qatysty şeşımnıŋ jariia türde jetkızıluıne nazar audardy. Universitet oqiǧaǧa qatysty tüsınıkteme berdı.
Äleumettık jelıde taraǧan videoda er adamnyŋ auditoriiada otyrǧan äielge qūjattardy ūsynyp jatqany körınedı. Jazbadaǧy äiel jūmystan bosatylu sebebın sūrap, tiıstı qūjattarmen tanystyrylmaǧanyn aitady. Video avtorlarynyŋ mälımetınşe, äiel universitette oqytuşy bolyp jūmys ıstegen. Jelı qoldanuşylary eŋbek qatynastaryna qatysty mäselenı studentterdıŋ közınşe talqylaudyŋ etikalyq jaǧyna nazar audardy.
QazŪU baspasöz qyzmetınıŋ mälımetınşe, video 7 qazanda, oqytuşymen eŋbek qatynastary toqtatylǧannan keiın tüsırılgen. Universitettıŋ habarlauynşa, onyŋ ornyna basqa oqytuşy taǧaiyndalǧan. JOO mälımetınşe, būrynǧy oqytuşy auditoriiaǧa kırıp, jaŋa taǧaiyndalǧan pedagogtan şyǧuyn talap etıp, sabaqty özı ötkızuge kırısken. Kadr bölımınıŋ ökılı oǧan jaǧdaidy talqylau üşın dälızge şyǧudy ūsynǧanymen, äiel äŋgımenı auditoriiada ötkızudı talap etken.
Universitet ökılderı videony oqytuşynyŋ ötınışı boiynşa studentter tüsırgenın mälımdedı. Sondai-aq äkımşılık kadrlyq qūjattardy auditoriiada jariia türde tapsyruǧa bastamaşy bolmaǧanyn atap öttı.
QazŪU mälımetınşe, eŋbek qatynastaryn toqtatu turaly būiryq 2026 jylǧy 2 qazanda tärtıptık komissiianyŋ şeşımı negızınde şyǧarylǧan. Universitet oqytuşy komissiia otyrysy turaly habardar bolǧanyn jäne öz ūstanymyn bıldıruge mümkındıgı bolǧanyn, alaida otyrysqa qatyspaǧanyn habarlady. JOO būiryqtyŋ köşırmesı zaŋnamada belgılengen merzımde oqytuşynyŋ tūrǧylyqty jerıne poşta arqyly jıberılgenın de aitty.
Universitettıŋ tüsındıruınşe, eŋbek qatynastaryn toqtatu turaly şeşım oqytuşynyŋ 2024–2026 jyldardaǧy jūmysyna qatysty anyqtalǧan bırqatar būzuşylyqqa bailanysty qabyldanǧan.
Atap aitqanda, JOO Univer aqparattyq jüiesınıŋ qauıpsızdık talaptary būzylǧanyn, sonyŋ ışınde studentterge oqytuşynyŋ eseptık jazbasyn paidalanuǧa rūqsat berılgen jaǧdailar bolǧanyn habarlady.
Būdan bölek, oqu-ädıstemelık materialdardy äzırleu, emtihan tapsyrmalaryn daiyndau, sabaq ötkızu jäne studentterdıŋ jūmystaryn tekseru talaptaryna qatysty olqylyqtar anyqtalǧany aityldy. Universitettıŋ pıkırınşe, būl jaǧdailar emtihan sessiialarynyŋ uaqtyly ötuıne jäne studentterdıŋ akademiialyq qūqyqtarynyŋ saqtaluyna kerı äser etuı mümkın bolǧan.
Sonymen qatar äkımşılık studentterdı, onyŋ ışınde kämeletke tolmaǧandardy, oqytuşynyŋ universitetpen aradaǧy eŋbek dauyna tartu mäselesıne alaŋdauşylyq bıldırdı.
QazŪU studentterdı jeke nemese eŋbek daularyn şeşu qūraly retınde paidalanuǧa bolmaitynyn atap öttı. Universitettıŋ habarlauynşa, jaǧdaidy retteu maqsatynda oqytuşymen tüsındıru jūmystary jürgızılıp, tärtıptık şaralar qoldanylǧan.
