رەسەيلىك رەپەر ءتيماتيدىڭ استانا مەن الماتىدا وتەتىن كونتسەرتى تۋرالى حابارلاندىرۋ الەۋمەتتىك جەلىلەردە ۇلكەن رەزونانس تۋدىردى. قازاقستاندىقتار بۇل جاڭالىققا جاپپاي نارازى پىكىرلەر قالدىرىپ، ءانشىنىڭ كونتسەرتىن توقتاتۋدى تالاپ ەتىپ جاتىر، دەپ حابارلايدى «ادىرنا» ءتىلشىسى.
Threads جەلىسىنىڭ قولدانۋشىلارى ۋكرايناداعى سوعىستى قولداعان ارتىستەردىڭ ءالى دە قازاقستانعا كەلىپ جاتقانىنا تاڭدانىستارىن ءبىلدىردى. بۇعان دەيىن قازاقستاندىقتار رەسەيلىك ءانشى پولينا گاگارينانىڭ كونتسەرتىن وتكىزۋگە قارسىلىق تانىتقان ەدى. ناتيجەسىندە بەلگىلەنگەن مەرزىمدە ونەر يەسىنىڭ كونتسەرتى بولماي قالدى.
ەندى ولار ءتيماتيدىڭ كونتسەرتىن دە توقتاتۋدى تالاپ ەتۋدە. پايدالانۋشىلار رەپەردىڭ سوعىسقا قولداۋ بىلدىرگەن مالىمدەمەلەرىن جارىسا جازۋدا.
كونتسەرت ۇيىمداستىرۋشىسى، پروديۋسەر جانە Eurostar Entertainment اگەنتتىگىنىڭ يەسى الەكسەي پۋچكوۆ دا تالقىلاۋعا بەلسەندى ارالاستى. ول قازاقستاندىقتارعا رەنىشىن ءبىلدىرىپ، مالىمدەمە جاسادى.
«جاقىندا عانا ءبىز ۇلكەن قيىندىقپەن The Weeknd-ءتىڭ الماتىدا كونتسەرت وتكىزۋى جونىندە كەلىسىمگە قول جەتكىزدىك. ءانشى 2026 جىلى قازاقستاندا ونەر كورسەتۋگە كەلىسىم بەرگەن بولاتىن. الايدا سوڭعى وقيعالار مەن جەلىدەگى تالقىلاۋلارعا بايلانىستى ءبىز كونتسەرتتى باسقا ەلدە وتكىزۋدى قاراستىرىپ جاتىرمىز»,– دەدى پۋچكوۆ.
ايتا كەتەيىك، ءتيماتيدىڭ كونتسەرتىنە قاتىستى ناقتى شەشىم ءالى قابىلدانعان جوق.
