Ресейдің Даниядағы елшісі Владимир Барбин әскери тікұшаққа қатысты оқиғаға байланысты Данияның сыртқы істер министрлігіне шақырылды, деп хабарлайды "Адырна" тілшісі.
Бұл туралы Данияның сыртқы істер министрі Ларс Лекке Расмуссен айтты.
Оқиға Гедсер қаласына жақын теңіз аумағында болған. Дания әуе күштерінің тікұшағы ресейлік фрегатты жоспарлы түрде суретке түсіру кезінде сигналдық зымырандармен атқыланған.
Данияның қарулы күштері тікұшақ экипажына сигналдық зымырандар атылғанын хабарлаған. Дания билігі бұл жағдайды жол беруге болмайтын әрекет деп бағалады.
Осыған байланысты Ресей елшісі Владимир Барбин Дания сыртқы істер министрлігіне түсініктеме беру үшін шақырылды.
Дания премьер-министрі Метте Фредериксен де оқиғаға қатысты пікір білдіріп, жағдайды «аса маңызды оқиға» деп атады.
Қазір оқиғаның мән-жайы анықталып жатыр.
