رەسەيدىڭ دانياداعى ەلشىسى ۆلاديمير باربين اسكەري تىكۇشاققا قاتىستى وقيعاعا بايلانىستى دانيانىڭ سىرتقى ىستەر مينيسترلىگىنە شاقىرىلدى، دەپ حابارلايدى "ادىرنا" ءتىلشىسى.
بۇل تۋرالى دانيانىڭ سىرتقى ىستەر ءمينيسترى لارس لەككە راسمۋسسەن ايتتى.
وقيعا گەدسەر قالاسىنا جاقىن تەڭىز اۋماعىندا بولعان. دانيا اۋە كۇشتەرىنىڭ تىكۇشاعى رەسەيلىك فرەگاتتى جوسپارلى تۇردە سۋرەتكە ءتۇسىرۋ كەزىندە سيگنالدىق زىمىراندارمەن اتقىلانعان.
دانيانىڭ قارۋلى كۇشتەرى تىكۇشاق ەكيپاجىنا سيگنالدىق زىمىراندار اتىلعانىن حابارلاعان. دانيا بيلىگى بۇل جاعدايدى جول بەرۋگە بولمايتىن ارەكەت دەپ باعالادى.
وسىعان بايلانىستى رەسەي ەلشىسى ۆلاديمير باربين دانيا سىرتقى ىستەر مينيسترلىگىنە تۇسىنىكتەمە بەرۋ ءۇشىن شاقىرىلدى.
دانيا پرەمەر-ءمينيسترى مەتتە فرەدەريكسەن دە وقيعاعا قاتىستى پىكىر ءبىلدىرىپ، جاعدايدى «اسا ماڭىزدى وقيعا» دەپ اتادى.
قازىر وقيعانىڭ ءمان-جايى انىقتالىپ جاتىر.
