Сарыағаш ауданы Қапланбек ауыл округіне қарасты Қанағат ауылындағы №7 Төле би атындағы жалпы орта мектептің 11-сынып оқушысы Ақжүніс Атахан әлемнің беделді 36 жоғары оқу орнынан шақырту алды. Бұл туралы бүгін, 21 мамырда Түркістан облысының әкімдігінің баспасөз қызметі жазды, деп хабарлайды «Адырна» тілшісі.
Халықаралық қатынастар мамандығын таңдаған жас түлек дүниежүзіндегі озық университеттерде білім алып, өз саласын жетік меңгерген майталман маман болуды армандайды. Әлем назарын аудартқан талапты оқушының ҰБТ-дағы бағалары да көз қуантарлық. Білім сынағының соңғы нәтижесі бойынша 111 ұпай жинаған.
Ауыл мектебінде оқитын Ақжүніс Асылханқызы шетелде оқып, жаңа ортада өзгенің мәдениетін танысам, білім көкжиегімді кеңейтсем деген ниетпен үздіксіз ізденген. Нәтижесінде ол Дубай, Түркия, Малайзия, Канада, АҚШ сынды дамыған елдердегі университеттерге құжатын жіберіп, 36-сынан шақырту алған. 16 жастағы оқушы Американың - 17, БАӘ - 5, Түркияның - 6, Малайзияның - 5 университетінің грантын ұтып алып, Канаданың 1 университетіне президенттік стипендиямен оқуға шақыртылып отыр.
«Мектеп табалдырығын аттаған сәттен бастап үздіктер тақтасынан түспеген Ақжүніс Атахан оқуда озат, ізденімпаз оқушылардың қатарынан көрініп келеді. Ақжүністің жетістігі - өңірдегі өзге оқушыларды қанаттандырды. Өйткені ол аталмыш білім ордасынан шетелдік оқу орындарынан шақырту алған алғашқы шәкірт. Талапты жас жаһанның мықты университетінің бірінде оқуын тәмамдап, елге қалтқысыз қызмет етуді мақсат етіп отыр»,—деп жазды Түркістан облысының Өңірлік коммуникациялар қызметі.
