سارىاعاش اۋدانى قاپلانبەك اۋىل وكرۋگىنە قاراستى قاناعات اۋىلىنداعى №7 تولە بي اتىنداعى جالپى ورتا مەكتەپتىڭ 11-سىنىپ وقۋشىسى اقجۇنىس اتاحان الەمنىڭ بەدەلدى 36 جوعارى وقۋ ورنىنان شاقىرتۋ الدى. بۇل تۋرالى بۇگىن، 21 مامىردا تۇركىستان وبلىسىنىڭ اكىمدىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
حالىقارالىق قاتىناستار ماماندىعىن تاڭداعان جاس تۇلەك دۇنيەجۇزىندەگى وزىق ۋنيۆەرسيتەتتەردە ءبىلىم الىپ، ءوز سالاسىن جەتىك مەڭگەرگەن مايتالمان مامان بولۋدى ارماندايدى. الەم نازارىن اۋدارتقان تالاپتى وقۋشىنىڭ ۇبت-داعى باعالارى دا كوز قۋانتارلىق. ءبىلىم سىناعىنىڭ سوڭعى ناتيجەسى بويىنشا 111 ۇپاي جيناعان.
اۋىل مەكتەبىندە وقيتىن اقجۇنىس اسىلحانقىزى شەتەلدە وقىپ، جاڭا ورتادا وزگەنىڭ مادەنيەتىن تانىسام، ءبىلىم كوكجيەگىمدى كەڭەيتسەم دەگەن نيەتپەن ۇزدىكسىز ىزدەنگەن. ناتيجەسىندە ول دۋباي، تۇركيا، مالايزيا، كانادا، اقش سىندى دامىعان ەلدەردەگى ۋنيۆەرسيتەتتەرگە قۇجاتىن جىبەرىپ، 36-سىنان شاقىرتۋ العان. 16 جاستاعى وقۋشى امەريكانىڭ - 17, ءباا - 5, تۇركيانىڭ - 6, مالايزيانىڭ - 5 ۋنيۆەرسيتەتىنىڭ گرانتىن ۇتىپ الىپ، كانادانىڭ 1 ۋنيۆەرسيتەتىنە پرەزيدەنتتىك ستيپەنديامەن وقۋعا شاقىرتىلىپ وتىر.
«مەكتەپ تابالدىرىعىن اتتاعان ساتتەن باستاپ ۇزدىكتەر تاقتاسىنان تۇسپەگەن اقجۇنىس اتاحان وقۋدا وزات، ىزدەنىمپاز وقۋشىلاردىڭ قاتارىنان كورىنىپ كەلەدى. اقجۇنىستىڭ جەتىستىگى - وڭىردەگى وزگە وقۋشىلاردى قاناتتاندىردى. ويتكەنى ول اتالمىش ءبىلىم ورداسىنان شەتەلدىك وقۋ ورىندارىنان شاقىرتۋ العان العاشقى شاكىرت. تالاپتى جاس جاھاننىڭ مىقتى ۋنيۆەرسيتەتىنىڭ بىرىندە وقۋىن ءتامامداپ، ەلگە قالتقىسىز قىزمەت ەتۋدى ماقسات ەتىپ وتىر»،—دەپ جازدى تۇركىستان وبلىسىنىڭ وڭىرلىك كوممۋنيكاتسيالار قىزمەتى.
