2025 جىلعى 13 جەلتوقساندا، بەيجىڭ ۋاقىتى بويىنشا ساعات 09:08-دە «قىتاي – قازاقستان» نانوسپۋتنيگى 530 كم بيىكتىكتە وربيتاعا ءساتتى شىعارىلدى. عارىشتىق زەرتتەۋلەرگە ارنالعان بۇل قۇرىلعى سولتۇستىك-باتىس پوليتەحنيكالىق ۋنيۆەرسيتەتى (سبپۋ) مەن ءال-فارابي اتىنداعى قازاق ۇلتتىق ۋنيۆەرسيتەتى بىرلەسىپ ازىرلەگەن.
نانوسپۋتنيك Ziwei Aerospace كومپانياسىنىڭ «ديەر-5» (ياو-8 ميسسياسى) عارىش اپپاراتى ارقىلى «كۋايچجوۋ-11» زىمىران تاسىعىشىمەن وربيتاعا جەتكىزىلدى.
ايتا كەتەيىك، 2024 جىلى قازۇۋ مەن سبپۋ ميكروسپۋتنيكتەردى زەرتتەۋ باعىتىندا بىرلەسكەن عىلىمي جۇمىستار جۇرگىزۋ تۋرالى كەلىسىمگە قول قويدى. بۇل كەلىسىم قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پەن قىتاي حالىق رەسپۋبليكاسىنىڭ توراعاسى سي ءتسزينپيننىڭ رەسمي ساپارى كەزىندە كەلىسىلگەن بولاتىن.
نانوسپۋتنيك بىرنەشە نەگىزگى مىندەتتەردى جۇزەگە اسىرادى: ماقساتتاردى جوعارى تۇراقتىلىقپەن مانەۆرلى باقىلاۋ، يكەمدى سەنسورلارعا نەگىزدەلگەن پلاتفورما وريەنتاتسياسىن ديناميكالىق قابىلداۋ جانە كومپەنساتسيالاۋ، سونىمەن قاتار OpenHarmony اشىق باستاپقى كودى بار وپەراتسيالىق جۇيەگە نەگىزدەلگەن قاشىقتىقتان زوندتاۋ كەسكىندەرىن اۆتونومدى تانۋ.
ازىرلەمەنىڭ ءتورت باستى ارتىقشىلىعى بار: كوممەرتسيالىق كومپونەنتتەر مەن يننوۆاتسيالىق ديزاين ارقىلى جوعارى ەكونوميكالىق تيىمدىلىك; جوعارى تۇراقتىلىق پەن ءدال باعىتتاۋ; وريەنتاتسيا قاتەلەرىن بەيىمدەلگەن تۇردە كومپەنساتسيالاۋعا ارنالعان جوعارى ەسەپتەۋ قۋاتى; دەرەكتەردى جەرگە جىلدام الۋ جانە جەتكىزۋ ءۇشىن جوعارى وپەراتيۆتىك ارەكەتتەستىك.
جوبا قازۇۋ بازاسىنداعى سبپۋ فيليالى، ء«بىر بەلدەۋ – ءبىر جول» باستاماسى اياسىنداعى ۇلتتىق بىرلەسكەن زەرتتەۋ لابوراتورياسى، اۋە-عارىش ينستيتۋتى جانە يكەمدى ەلەكترونيكا ۇلتتىق نەگىزگى زەرتحاناسىنىڭ قولداۋىمەن جۇزەگە اسىرىلدى.
جوبانىڭ كونسۋلتانتى – اكادەميك حۋان ۆەي، جالپى جەتەكشىسى – پروفەسسور يۋە سياوكۋي، جەتەكشىنىڭ ورىنباسارى – قازۇۋ پروفەسسورى زاۋرە بايانقىزى راقىشەۆا. بىرلەسكەن زەرتتەۋ توبىنا قىتاي مەن قازاقستاننان 20-دان استام مامان جانە جاس زەرتتەۋشى قاتىستى.
بۇل بىرلەسكەن جۇمىس عارىشتى زەرتتەۋ، بىلىكتى ماماندار دايارلاۋ جانە ورتاق سپۋتنيكتەردى جاساۋ، سونداي-اق، ميكروسپۋتنيك ارقىلى جەردى قاشىقتىقتان زەرتتەۋ مۇمكىندىگىن بەرەدى.
