Рим Папасына тиесілі мотоцикл Мюнхен қаласындағы RM Sotheby’s аукцион үйінде 156 мың еуроға (шамамен 98 миллион теңге) сатылды. Бұл қаражат Мадагаскардағы балаларға көмек көрсетуге бағытталады, деп хабарлайды “Адырна”.
Сатылымға қойылған BMW R 18 Transcontinental үлгісіндегі мотоцикл XIV Папа Левке арнайы сыйға тартылған. Көлік ерекше түсте жасалған – оның түсі Рим Папасының ресми көлігі – папамобильдің стилінен шабыттандырылған. Сонымен қатар, мотоциклдің жанармай багына Рим папасы өз қолтаңбасын қалдырған және онымен бірнеше фотосуретке түскен.
Аукционнан түскен қаржы толықтай қайырымдылық мақсатында жұмсалмақ. Ұйымдастырушылардың айтуынша, бұл қаражат Мадагаскардағы балалардың әлеуметтік жағдайын жақсартуға, білім беру мен медициналық көмекке бағытталады.
Аукционда бұл лот ерекше қызығушылық тудырды. Коллекционерлер мен қайырымдылыққа бей-жай қарамайтын азаматтар мотоциклге жоғары баға ұсынды. Сарапшылар бұл сатылымды тек көлік немесе коллекциялық зат ретінде емес, рухани құндылық пен игі істерді ұштастырған ауқымды шара деп бағалап отыр.
