Ер адам Алматыда сирек кездесетін қар барысын жақыннан видеоға түсірген, деп хабарлайды “Адырна” ұлттық порталы Tengri Travel-ге сілтеп.
Алматы тұрғыны жыртқышты Алма-Арасан шатқалында кезіктірген.
Қар барысы теңіз деңгейінен шамамен 1700-2500 метр биіктікке дейін төмендеген. Әдетте аса сақ келетін жыртқыш тек биік тауларда орнатылған фототұзақтарға ғана түсетін. Түсірілім кезінде барыс аң аулап, олжасын жеп жатқан.
Сирек кадрлардың авторы — кәсіпкер Анатолий Гаипов. Оның айтуынша, жыртқыш онымен шамамен 30–40 метр қашықтықта болған.
«Алдымен адреналин болды, кейін сабыр мен жинақылық келді. Мұндай сирек сәтті міндетті түрде камераға түсіру керек деп ойладым», — дейді ол.
Анатолий Алма-Арасан шатқалына жақын жерде тұрады. Ол бұған дейін аю мен қасқырларды алыстан көргенімен, жабайы жануармен мұншалықты жақын кездесуі алғаш рет болғанын айтады.
