Ресей президенті Владимир Путин ресейліктерден өзі бастаған Украинаға қарсы әскери агрессияның табысты болуы үшін еңбек етуді талап етті, деп хабарлайды «Адырна» тілшісі.
Ол бұл соғысты тағы да 1941–1945 жылдардағы КСРО-ның гитлерлік Германияға қарсы қорғаныс соғысымен салыстырды.
«Ұлы Отан соғысы кезінде бүкіл тыл, майдан үшін, сарбаздарымыз үшін, қорғаушыларымыз үшін жұмыс істеді. Тек танк, ұшақ, зеңбірек пен снарядтар ғана жасалған жоқ», — деді Путин 21 сәуір күні Мәскеуде өткен «Кіші Отан — Ресейдің күші» форумында.
Оның айтуынша, әйелдер шұлық тоқып, майданға сәлемдемелер мен сыйлықтар жіберген
«Жеңіс дәл осы бірлік арқылы келді. Қазір де солай болады», — деп қосты Ресей президенті.
Айта кетейік, жыл өткен сайын соғыстың жалғасуын қалайтын ресейліктердің саны азайып барады. «Левада-орталығының» мәліметінше, Ресей Украинаға қарсы бесінші жыл жүргізіп отырған ауқымды соғыс жағдайында келіссөздерді қолдайтын ресейліктер саны рекордтық деңгейге жеткен. Ақпанда жүргізілген репрезентативті сауалнамаға қатысқандардың 67%-ы бейбіт келіссөздерді бастау қажет деп санайды. Сонымен бірге әскери әрекеттерді жалғастыруды қолдайтындардың үлесі азайып, бақылау жүргізілген уақыттағы ең төменгі деңгейге — 24%-ға дейін түскен.
