Қазақстан Президенті Қасым-Жомарт Тоқаев елдің вице-президентінің кім болатынын алдағы бір апта немесе он күн ішінде жариялайтынын мәлімдеді. Бұл туралы Тоқаев парламенттік сайлауда дауыс бергеннен кейін журналистерге айтты, деп хабарлайды "Адырна".
«Вице-президент қызметіне кім тағайындалатыны алдағы бір апта немесе он күн ішінде белгілі болады. Қазір оның есімін атау ертерек. Меніңше, бұл барлығыңыз жақсы білетін адам болады», – деді Тоқаев.
Президенттің айтуынша, вице-президент лауазымы Қазақстанға қазіргі күрделі кезеңде аса қажет. Ол бұл қызметтің енгізілуін елдің жаңа Конституциясында бекітілген маңызды өзгерістердің бірі ретінде атап өтті.
«Қателеспесем, бұл қызмет бізге өте қажет. Қазіргі күрделі кезеңде мұндай лауазымның Қазақстан үшін маңызы зор», – деді Мемлекет басшысы.
Сондай-ақ Тоқаев жаңа бір палаталы Парламент – Құрылтай депутаттарының сайлауын тарихи оқиға деп атап, оны ауқымды жұмыстың басталуы ретінде бағалады.
«Бүгінгі сайлау – осы үлкен жұмыстың бастауы ғана», – деді Президент.
Оның сөзінше, Қазақстан қазірдің өзінде маңызды нәтижелерге қол жеткізді, алайда алға қойылған мақсаттарды жүзеге асыру бойынша жұмыс жалғаса береді.
Президенттің айтуынша, вице-президентті Мемлекет басшысы тағайындайды. Алайда оның кандидатурасын Құрылтай депутаттары мақұлдауы тиіс.
